Кеше «Іле» полигонында «Дала қыраны – 2011» тактикалық-арнайы бітімгерлік оқу-жаттығулары басталды
Биылғы оқу-жаттығуларға Қазақстан армиясы, Ұлыбритания және АҚШ Қарулы Күштерінің әскери қызметшілері ғана емес, Литва және Қырғыз Республикасының жауынгерлері де қатысуда.
Оқу-жаттығуға 1400-ден астам әскери қызметші және жүзге жуық жауынгерлік техника тартылған. Биылғы бірлескен жаттығулар осымен тоғызыншы рет өткізіліп отыр.
Жаттығулардың ашылу салтанатына Қорғаныс министрлігі Штабтар бастықтары комитеті төрағасының орынбасары, генерал-майор Мұқан Дүйсекеев, шет мемлекеттердің әскери бақылаушылары, НАТО-ның әртүрлі штабтарынан сарапшылар және Қазақстан Республикасында тіркелген әскери-дипломатиялық корпус өкілдері қатысады.
Жаттығуды өткізу мақсаты – бітімгершілік операцияларды орындау кезінде Қазбриг пен альянс қарулы күштері бөлімшелерінің үйлесімділігін тексеру, сондай-ақ бөлімшелерді үздіксіз басқару кезінде командирлердің іс-тәжірибедегі дағдыларын жоғарылату, бітімгершілік операцияларын өткізу барысында өзара іс-қимылдарды ұйымдастыру.
«Дала қыраны» жаттығуы 2003 жылы басталып, бірінші рет екіжақты ынтымақтастық шеңберінде Ұлыбританияда өткізілген болатын. Оқу-жаттығу бітімгершілік операциялары кезінде «Қазбригтің» жедел үйлесімділігіне жетуге бағытталған және бітімгершілік бриагадасының біріккен қолбасшылықпен көп ұлтты күштер құрамында тапсырмаларды орындау қабілеттерін шынайы тексереді.
Оксана Парпура, Қорғаныс министрлігі баспасөз қызметінің қызметкері.
Суреттерді түсірген Ермек Сарбасов.