Қасиетті Рамазан айында «Мемсараптама» РМК ұжымы Астанадағы мамандандырылған балалар үйінде тәрбиеленетін жетім балалар үшін қайырымдылық акциясын ұйымдастырды. Қызметкерлер өздері жинаған қаржыға бөбектер үйінің тәрбиеленушілеріне арнап балалар тағамдары мен шырындар, су өткізбейтін жаялықтар сатып алды.
Рамазан – мейірімділік айы. Әсіресе мұқтаждарға, оның ішінде жетімдер мен ауыр науқастарға көмек көрсету ісіне ерекше маңыз беріледі. Астаналық бөбектер үйіндегі туғанынан бастап 4 жасқа дейінгі 70 баланың 30 пайызға жуығы ақыл-ой және дене дамуында кемістіктері бар мүгедектер. Мекеме қызметшілерінің айтуларынша, дені сау балаларды асырап алушылар бірден табыла кететін көрінеді. Ал денсаулықтарында проблемалары бар бүлдіршіндер болса, көбіне-көп осы жерде қалып жатады. Сондықтан көрсетілген қайырымдылық пен мейірімнің бөбектер бойында жұрт бізге немқұрайды қарамайды деген сенім оятуы мүмкін-ау деген үміт те жоқ емес.
«Егемен-ақпарат».