«Астана» атын иемденген зейнетақы жүйесіндегі жаңа қор салымшылар аманатын ақтай ала ма?

Еліміздің жинақтаушы зейнетақы жүйесіне жаңа имиджге ие ойыншы  «Астана» жи­нақ­таушы зейнетақы қоры» АҚ қосылғанына да көп бола қойған жоқ. Нарықтың екі қатысушысының бірігуі нәтижесінде құрылған «Астана» жи­нақ­таушы зейнетақы қоры үстіміздегі жыл­дың тамыз айында ғана іске кірісті. Осыған қарамастан, «Еура­зиялық жинақтаушы зейнетақы қоры» АҚ пен «Аманат-Қазақстан ЖЗҚ» АҚ бірігуі нәтижесінде пайда болған «Астана» ЖЗҚ» АҚ алғашқы айдың өзінде табыс­­­­­­­тылығы жағынан еліміздегі зей­нет­ақы қорларының алдына шыққан. Бұл туралы және өзге де елдегі зей­нет­ақы жүйесіндегі жаңалықтар туралы жуырда өткен баспасөз мәслихатында кеңінен сөз болды. Осы арада елімізде біріккен зей­нетақы қор­лары әлсіз қорларды «жұ­тып» қойғанын айта кету қажет. Бә­секелестік ортада бұл қалыпты жағ­дай. Уақыт жинақтаушы зейнетақы қор­ларын өз екшеуінен өткізіп жат­қа­нына салым­шылар да куә болуда. Бү­гінде зейнетақы қорларының бірігуі тосын оқиға емес, салымшылар үшін олар­дың қызметінің ашықтығы мен сенімділігі көкейкесті болып отыр. Дегенмен, бірден-ақ көшбасшылық қағиданы ұстанған жаңа зейнетақы қо­ры жұмысын инвестициялық табысты­лық­пен бастап отырғаны бұқаралық ақпарат құралдарының (БАҚ) өкілдері тарапынан үлкен қызығушылық туғы­зуда. Демек, бұл келешекте салым­шы­лардың мүддесін оятады. Қысқасы, тамыз айында «Астана» қорындағы салымшылардың зейнет­ақы жинақтарының инвестициялық кірісі (К2-12) 7,52 пайызды құрады. Ал на­рық­тағы орташа көрсеткіш – 5,05 пайыз. Нарықтағы екі қатысушысының бірігуі бірден-ақ «Астана» қорының са­лым­шыларының санын еліміздегі зей­нет­ақы жүйесіндегі төртінші орынға шығарған. Қазақстан Бақылау Комитеті мәліметтері де аталмыш қор на­рық­тың ірі қатысушысы деңгейіне көте­ріл­генін айғақтайды. Яғни, 01.08.2011 жыл­дың жағдайы бойынша Қордың ак­тивтері 128 миллиардтан астам тең­гені, салым­шылар саны 547 мың адам­ды құраған. Сондай-ақ қордың беделін көтеріп, көшбасшылық рөлге ие болу үшін акционерлер түпкілікті өзгерістерге ба­рып отырғанын айта кеткен жөн. Ребредингті жүзеге асыру нәтижесінде құрылған «Астана» атауы да жаңа қор­ға үлкен жауапкершіліктер жүктейді. Елорданың атын иемденген Қор са­лымшылардың сенімінен шыға ала ма? Мұны келешек көрсетеді десек те, бү­гін еңбек етіп, ертең оның зейнетін көруге үміттеніп отырған салымшылар елдегі жинақтаушы зейнетақы қор­ла­ры­ның барлық әрекетінен хабардар бо­лып, ақи­қатқа құрылған ақпарлар алып оты­руға құқылары бар. Баспасөз мәслихаты кезінде «Астана» Қоры Директорлар кеңесінің төр­айымы, «Орталық Азия Отын-Энер­ге­тикалық Компаниясы» АҚ президенті Гүлнара Артамбаева: – «Астана» Қорының стратегиясын анықтаудағы басты фактор бірігу идея­сы болған. Себебі екі қордың са­лым­шылары біздің клиенттеріміздің санын құрайды. Бизнестің операциялық құ­­рам­дасындағы екі команда, екі тарихи жеке бағыт біріккендіктен, біздің міндетіміз жаңа Қорға сол екі құ­­ры­лым­ның оңды тәжірибесін, оларға тән ең жақсы қасиеттерді енгізіп, салым­шы­­лар мүддесі үшін оларды көбейту бол­ды. Қарқынды дамудың нәтижесінде бүгінде «әлем картасы» деңгейіне жетіп, қазақстандықтардың ортақ мақта­нышына айналған, еліміздің жетістік философиясының айқын көрінісі бо­­лып табылатын елордамыз Аста­на­ны Қор­дың символы ретінде алдық, – деді. Г.Артамбаеваның айтуынша, біріктірілген Қордың ребредингі компа­ния­ның сыртқы бейнесі мен атауын өз­гер­тумен шектелмейді. Қорда қазіргі заманғы тиімді технологиялық шешімдер енгізілуде. Олар салымшыларға қыз­мет көрсетудің сапасын арттырып, сенімді әріптестік қарым-қатынас құ­руға мүмкіндік бермек. Журналистердің жаңа қорға қа­тыс­ты сауалдарына түсініктемелер берген «Астана» ЖЗҚ Басқарма төр­аға­сы Андрей Карягин: – Тамыз айында инвестициялық табыстылық жүйесіндегі ең жоғары көрсеткіш – 7,5 пайыз деңгейіне көте­рі­лу Қордың бастапқыда таңдалған жә­не жан-жақты ойластырылған сапалы ин­вестициялық стратегиясының логи­калық нәтижесі болып табылады, – деді. А.Карягин жаңа Қор аса ма­ңыз­ды мәселелерге назар аудара отырып, ин­вестициялық портфельдің мөлдірлігі мен басқару нәтижелерінің барынша тұрақты болуын қамтамасыз етуде жүйелі тә­сілдердің барлығын қолдана­тындық­тарын атады. Сол сияқты сенімді стратегиялық серіктестік те бұл жерде үлкен рөл ат­қар­мақ. Осы тұрғыдан алғанда, «Астана» ЖЗҚ» АҚ «Сбербанк» ЕБ» АҚ-пен бірегей стратегиялық серіктестік ту­ра­лы мәмілеге келген. Бұл келісім ая­сын­да Қор салымшылары талабы жоғары клиенттеріне түрлі мүмкіндік туғызып беретін бірлескен өнімдерге қол жеткізбек. Атап айтқанда, жылдық 10 пай­ыз­бен және 10 пайыздық ең төменгі са­лым барысында 10 жылға берілетін ипотека «Ондыққа тигіз!» бірегей ұсы­ныстар пакетінің бір бөлшегі болып табылады. Демек, Қор салымшысы «Сбербанк» ЕБ» АҚ клиентінің кар­тасын да қосымша иелене алады. – Біз үшін бірегей серіктестік жо­лымен әрекет етудің мәні зор. Өзі­міз­бен көптеген жылдар бойы іскерлік қарым-қатынас жасап жүрген қордың акционері және біздің серіктесіміз «Орталық Азия Отын-Энергетикалық Ком­паниясы» АҚ-ты ерекше атап өт­кім келеді. Шынайы әріптестікке негізделген жоспарлар үне­­мі стратегиялық тұрғы­да тоқтаусыз ұл­ғай­ып тұруымен сипат­талады. Осы тұр­ғыдан алғанда, біздің серіктесіміздің жо­ғары беделі, корпоративтік мәдениетінің ұқсастығы «Сбер­банк» ЕБ» АҚ-тың бүкіл ко­ман­дасы үшін өте жақсы үлгі болып отыр, – дейді «Сбербанк» ЕБ» АҚ Басқар­ма­ төрағасы Олег Смирнов. Сонымен, еліміздегі зейнетақы жү­йесінде пайда болған жаңа Қордың жоспарлары мен келешегін «Орта Азия­­лық Отын Энергетика Компа­ния­сы» АҚ президенті Гүлнара Артамбаева қорытындылады. – Біз үшін зейнетақы бизнесі – ұзақ мерзімді өсімнің ресурсы және тиімді бизнесі болып табылады, – дегенді алға тартқан Артамбаева ханым «Астана» ЖЗҚ» АҚ нарыққа ұзақ мерзімге және сенімді де салиқалы жұмыс істеуге келгенін айтады. Айнаш ЕСАЛИ, Алматы.