Отандық БАҚ пен үкіметтік емес ұйымдарды дамыту төртінші блокқа жатқызылды. Солардың алдыңғысы – БАҚ-қа қатысты айтатын болсам, қоғам дамуы барысында бұқаралық ақпарат құралдарының алатын орны зор екені күмән туғызбайды. Сондықтан да болар, елімізде БАҚ-тар саны жылдан жылға артып келеді. Сол сияқты үкіметтік емес ұйымдар үлкен күшке айналып отыр. Елбасы сессияны ашарда сөйлеген сөзінде осы мәселелерге ерекше назар аударып, депутаттар алдына заңдарды жетілдіру міндетін қойды. Өздеріңізге мәлім, Үкімет осы орайда «Телерадио хабарларын тарату туралы» заң жобасын әзірледі. Енді аталған заңдық құжат телерадио хабарларын тарату сапасын арттыруға өзіндік серпін қосады деп күтілуде.
Біз бұған дейін де бұқаралық ақпарат құралдарына қатысты заңға бірқатар өзгерістер енгізген болатынбыз. Алайда, уақыттың өз талабы бар, яғни осы орайда шешімін күткен мәселелер де аз емес деген ойдамын. Радио және телехабарларын таратуды бір жүйеге түсірудің уақыты жетті. Өкініштісі сол, біз әлі күнге шетелдік ақпарат құралдарының ықпалынан арыла алмай отырмыз. Отандық телеарналар мен радиоэфирлеріміз солардың хабарларын, желілерін пайдаланады. Ал бізге өзіміздің елдік мүддені, ұлттық мүддені көздейтін ақпарат құралдарының болғаны ауадай қажет.
Мемлекеттік тіл мәселесін ұдайы көтеріп келеміз. Тәуелсіздік туралы айтқанда, соның бір тұғыры, сүйеніші мен тірегі тіл болуы керек. Бұл орайда, осы саладағы белгіленген шаралар түгел орындалып жатқан жоқ. Кезінде қойылған талаптар кейбір арналар үшін орындалмайтын нормаға айналды. Есесіне «Қазақстан» телеарнасы түгелдей қазақшаға көшті. Бұл – көңіл қуантатын жәйт. Менің ойымша, бұл бастама жалғасын табуы тиіс. Үкіметтік ұйымдар жұмысына келер болсақ, олардың бір мақсатқа қызмет етуін қамтамасыз ету үшін заңнамалық база керек. Депутаттар арасында осы сала өкілдері де бар. Заң жобасын талқылау өз нәтижесін береді деп сенемін.
Жарасбай СҮЛЕЙМЕНОВ, Мәжіліс депутаты.