Шараға ҚХА Төрағасының орынбасары Дарxан Мыңбай, Парламент Мәжілісінің депутаттары, ЭКСПО-2017 көрмесіне келген шетелдік қонақтар, ҚХА ғылыми-сараптамалық кеңесінің мүшелері, дипломатиялық корпустың, мемлекеттік органдардың, этномәдени бірлестіктердің өкілдері, зиялы қауым өкілдері қатысты.
Салтанатты жиында алғысөзді алған Мемлекеттік xатшы Гүлшара Әбдіқалықова дүние жүзінде ұлтаралық кикілжің салдарынан болып жатқан проблемалар жайлы, сондай-ақ Қазақстанның бейбіт өмір сүруінің басты себебін айтып өтті.
– Өздеріңіз білесіздер, Елбасы Н.Назарбаев Семей ядролық полигонын жауып, әлем жұртын алапат қасіреттен құтқарды. Бүгінде Орталық Азияда ядролық қару жоқ. Себебі, бұл аймақта атом энергиясын бейбіт мақсатта ғана пайдалануға болады. Дегенмен, Қазақстанда одан да қуатты энергия бар екенін айта кеткім келеді. Ол – бірлік, бейбітшілік пен келісім энергиясы. Біз осы бағыттағы бай тәжірибемізбен, достық пен өзара сенім энергиясымен бөлісуге дайынбыз, – деді Гүлшара Әбдіқалықова.
Шараға қатысқан Германия мәдениетаралық байланыс орталығының директоры Константин Шамбер Қазақстанда туып-өсіп, осы мекеннің тәрбиесін бойына сіңіргенін ерекше атап өтті. Сәби күнінде тарихи отанына көшіп кеткенмен, туған еліне деген аңсары ауып, жиі келіп тұратынын мәлімдеді.
– Қанша дегенмен туған елімнің орны бөлек. Астанаға әр келген сайын еріксіз таң қалып қайтамын. Қазақ елі күн санап дамып бара жатқанын байқаймын. Осы қарқынымен жалғастыра берер болса, Қазақстан дамыған елдердің қатарынан көрінеріне сенімім мол. Әлемнің бірқатар елдерін аралап көрдім. Бірақ дәл қазақ халқындай өзге ұлт өкілдеріне мейіріммен қарағанын байқамадым. Осы жағынан тіпті, Германияның да Қазақстаннан үйренері көп деп айтар едім. Себебі, Алмания елі қанша деңгейде дамығанмен, тұйық мінезді xалық. Өзге ұлт өкілдеріне Қазақстандағыдай көңіл бөлмейді. Оған бірер жыл бұрын көшіп келген босқындардың жай-күйі бірден-бір дәлел, – деді Константин Шамбер.
Ал Қазақстандағы әзербайжандар қоғамының төрағасы Абилфас Хамедов жер аударылып келген әке-шешесінің тұрмыс-тіршілігін, қазақ xалқының тигізген көмегін қысқаша баяндап берді.
– Өткен ғасырдың отызыншы жылдары әке-шешем Мақтаарал жеріне депортацияланып келді. Ішерге асы, киерге киімі, тұратын үйі болмаған. Сол кезеңде қазақтың да жағдайы мүшкіл еді. Дегенмен, сондай күйіне қарамастан әр үй бір отбасыдан бөліп алып, бауырларына басты. Қазақтың осындай дархан көңілі бүгінде біздің жер басып, тіршілік етіп жүргенімізге себепші болып отыр, – деді Абилфас Хамедов.
Жиын барысында Қазақстан xалқы Ассамблеясының құрылу тариxы, оның мақсаты мен бүгінгі міндеті арнайы әзірленген бейнематериал арқылы көрсетілді. Шараға жиналған қауым xалқымыздың ұлттық тағамдарынан дәм татып, қазақ жерінде тұратын түрлі ұлттардың салт-дәстүрлері, әдет-ғұрыптарымен кеңінен танысып шықты.
«Бейбітшілік және келісім энергиясы» атты жиын аясында Қазақстан халқы Ассамблеясының Бейбітшілік және келісім аллеясы ашылды. Салтанатты шарада Мемлекеттік хатшы Гүлшара Әбдіқалықова сөз сөйледі.
– Орталық Азияда алғаш рет елімізде өтіп жатқан ЭКСПО халықаралық мамандандырылған көрмесінде күллі әлемнің болашақ энергиясы саласындағы соңғы жетістіктері мен заманауи технологиялары көрсетіліп жатыр. Еліміздің атын дүние жүзіне айшықтайтын жаһандық шара аясында Қазақстан халқы Ассамблеясының аллеясын ашып отырмыз. Бұл – татулық пен бірліктің символы іспетті. Бейбітшілік пен келісім энергиясы – ғаламшардағы ең таза әрі игілікті энергия екені аян. Осы аллеямен жүрген әрбір адам қазақ халқының қонақжайлығы мен бауырмалдығын жүрегімен сезініп, елімізде орныққан бейбіт өмірдің шуағын әлемге таратады дегенге сенеміз,– деді Мемлекеттік хатшы.
Аллея ашылуында этномәдени бірлестіктер мен шығармашыл жастардың театрландырылған шеруі, халықтық қолданбалы өнер шеберлерінің «Шеберлер ауылы» көрме-жәрмеңкесі, «Алға, Қазақстан!» флешмобы өтті.
Қымбат ТОҚТАМҰРАТ,
Аян ӘБДУӘЛИ,
«Егемен Қазақстан»
Суреттерді түсірген
Ерлан ОМАРОВ,
«Егемен Қазақстан»