Абай еліндегі жарқын жаңалықтар

Ел Тәуелсіздігінің 20 жылдығына орай жер-жердің бәрінде атқарылып жатқан 20 жарқын іс аясында Абай ауданында да көптеген шаралар жүзеге асырылуда. Нақтылап айтсақ, осы мерзімде 150-ге жуық игі іс қолға алынып, 200 миллионнан астам теңгенің қаржысы игерілген. Ай­талық, бір ғана Саржал ауылдық округінде жал­пы құны 36 миллионнан астам теңге бо­латын 17 іс жүзеге асырылыпты. Соның қа­тарында атал­ған ауылдың түлегі, самбодан спорт шебері Берік Қанафин осындағы орта мектептің спорт залын күрделі жөндеуден өткізіп қана қоймай, оны спорт құрал жабдық­тарымен қамтамасыз етсе, ауылда пайдалануға берілген 400 орындық мәдени демалыс орны да осы азаматтың демеушілігімен қатарға қосылған екен. Ал есімі елге белгілі кәсіпкер, облыстық мәс­­лихаттың депутаты, облыстың құрметті аза­маты Ғаббас Ибраев болса аудан орта­лы­ғы Қарауыл ауылындағы Құнанбай қажы мешітін күрделі жөндеу жұмысына 3 миллионнан астам теңге бөлген көрінеді. Мұндай игі шарадан Курчатов қаласындағы «Дегелең­тас» кәсіпор­ны­ның басшысы Владимир Ковалев та сырт қалмапты. Оның демеушілігімен Қарауылдағы орталық алаңда Астанадағы «Хан шатыры» іспеттес сахна тұрғы­зыл­ған. Атымтай жомарт атанған Владимир осы шаруаға деп 5 миллионнан астам қаржы босатыпты. Қарауылдағы тағы бір жаңалық сол, тәуел­сіздік мерекесі қарсаңында мұнда ұзақ жылдан бері иесіз қалған «Арман» кино­театры «Жастар үйі» болып қайта ашылды. Енді мұнда аудан жастарының өнермен шұ­ғыл­данып, көңіл­ді демалуына барынша жағдай жасалған. Мұндай жақсы жаңалықтар ақын Көкбай ауылынан да көптеп естіле бастады. Айталық, біз­дің тілші қосынымен жиі хабарласып тұра­тын газет жанашыры, ауданның ішкі саясат бөлімінің меңгерушісі Жақсылық Екібаев осы ауылда тәулігіне 20-25 ірі қара мен 200 ұсақ мал соятын арнайы мұздатқыш камерамен жабдықталған мал сою алаңы іске қосылғанын айтса, енді Тақыр елді мекеніндегі ақын Көкбайдың кесенесі мен мұражайына құны 5 милллион теңгенің күрделі жөндеу жұмыстары жүргізілгенін хабарлаған. Ол, сон­дай-ақ бұл игі шаруаға ауданның құрметті азамат­тары Сайлау Кошкин, Амантай Мұқатаев және Семейде тұратын белгілі кәсіпкер Төлеуғазы Иманғалиев демеушілік жасағанын айта кетуді де ұмытпаған. Дәулет СЕЙСЕНҰЛЫ.      Шығыс Қазақстан облысы.