Пленэрдің мақсаты − тәуелсіз еліміздің салт-дәстүрін, әдет-ғұрпын, ғасырлардан сыр шерткен қасиетті сәулеттік ескерткіштерін, тарихи орындар мен ұлттық өнерді насихаттау мақсатында түркі тілдес елдердің еңбек сіңірген өнер қайраткерлері жəне талантты қылқалам шеберлерімен кескіндеме саласы бойынша өзара тәжірибе және пікір алмасуды жүзеге асыру. Сонымен қатар, Оңтүстік өңірінің өзіндік табиғи географиялық ерекшеліктері мен көз тартарлық орындарын бейнелейтін халықаралық деңгейдегі өнер шығармаларын жасау, бейнелеу өнерінде жаңа көркем бағыттар және пластикалық шешімдер мен формаларды іздестіру көзделеді.
Пленэрге 9 мемлекеттің, яғни, Түркия, Түрікменстан, Өзбекстан, Қырғызстан, Ресей Федерациясы, Украина, Болгария, Молдава елдерінен 17 суретші, ал еліміздің Астана, Алматы, Павлодар, Шымкент қалаларынан 13 кәсіби суретші өнер профессорлары шақырылған.
Жиында сөз алған облыстық мәдениет басқармасының басшысы Нұрболат Ахметжанов Мемлекет басшысының «Болашаққа бағдар: рухани жаңғыру» мақаласында арнайы тоқталған «Туған жер» бағдарламасын жүзеге асыруда бүгінгі отырыстың мәні ерекше екендігін айтты. Кең-байтақ Қазақстанда қылқалам шеберлерінің шабытын шақыратын сұлу табиғаттан бөлек түркі халқына ортақ жәдігерлер көп. Алқақотан басқосуда ТҮРКСОЙ халықаралық ұйымының мүшесі Санжар Мұлазымоглу осы жағына баса тоқталды.
Оңтүстіктің тумасы, бұл жердің барлық тарихын бес саусақтай жақсы білетін Суретшілер одағының мүшесі Сейсенхан Маханбетов киелі орындар мен табиғат көркемдігін суреттеу тұрғысындағы іс-шаралардың өз мәнінде өтетіндігіне сенім білдірді.
Дөңгелек үстел басында алдағы жұмыстарды бір пысықтап алған қылқалам шеберлері Түркістан қаласына жол тартты. Үш күндік жұмыс барысында Отырар ауданындағы Арыстан баб кесенесі мен тарихи, мәдени ескерткіштер және Хан тағы, Қаратау қорығы аумағы, Бәйдібек ауданының Ақмешіт, Қостұра аймағы мен Қазығұрт, Сайрам-Өгем тау шатқалдары, Шымкент қаласының көрікті орындарында жұмыс істемек.
Олар мәдени шара аясында жұмыстарын тәмамдаған соң Шымкентке оралып, облыстық бейнелеу өнері музейінде тағы да бас қосады. Бұл жолы плэнер барысында жасаған жұмыстар қорытындыланады.
Бақтияр ТАЙЖАН, «Егемен Қазақстан»
Оңтүстік Қазақстан облысы