Мемлекет басшысы Нұрсұлтан Назарбаев Түрік Республикасының Президенті Абдулла Гүлге осы елде болған жер сілкінісіне байланысты көңіл айту жеделхатын жолдады, деп хабарлады Қазақстан Республикасы Президентінің баспасөз қызметі.
«Түркиядағы Ван провинциясында болған жер сілкінісінің салдарынан көптеген адамдар құрбан болғаны туралы суық хабарды терең күйзеліспен қабыл алдым. Бұл үлкен апаттан зардап шеккендерге қажетті көмек беруге дайын екендігімізді білдіремін. Тағиғат апатынан қаза тапқан жандардың туған-туыстары мен жақындарына, сондай-ақ бауырлас түрік халқына Қазақстан халқының атынан және өз тарапымнан көңіл айтып, қайғыларыңызға ортақ екендігімізді білдіремін», делінген жеделхатта.