Семейде «СемАЗ» деп аталатын зауыт бар. Кезінде ол автобус шығарумен айналысқан-ды. Әлемдік дағдарыс екі бүйірден келіп қысқан соң бұлардың автобустары өтіңкіремей тұрып қалған. Сонсоң аталған кәсіпорын сипаты бүтіндей өзгеріп, енді мұнда «Беларусь» тракторы шығарыла бастаған. Яғни, бұлар қол қусырып қарап отырмай Минскінің трактор зауытымен байланысқа шыққан. Сөйтіп, аталған трактор түрі осында құрастырыла бастаған.
Ал содан бері де екі-үш жыл өте шығыпты. Осы мерзім ішінде мұндай трактордың екі-үш түрін шығару жолға қойылды. Бұрнағы жылы Елбасы Семейге келген сапарында соның оншақтысын көп балалы фермерлерге сыйға тартқаны да есімізде. «СемАЗ» жауапкершілігі шектеулі серіктестігі енді міне, биылғы жылы «Ел Тәуелсіздігінің 20 жылдығына – 20 жарқын іс» акциясы аясында «Беларусь 3022дц.1» деп аталатын жаңа трактор түрін шығаруды қолға алған. Мереке қарсаңында сол игілікті шаруа өз шешімін тауып отыр.
Соның айғағындай, алғашқы тракторлар шаруа қожалықтарына жөнелтіліп үлгерілді. Жаңа тракторға 300 аттық күші бар неміс өндірісінің двигателі орнатылған. Оның өзі жанармай үнемдеуге жол ашып отыр. Жаңа трактор күніне 60 гектарға жуық жерді өңдеуге күш-қуаты артығымен жетеді. Осы орайда оған егіс алқабын өңдейтін техниканың қай-қайсысын болсын тіркеуге болатындығын айта кеткен жөн. Трактордың автоматты түрде басқарылатындығы, салонына қолайлы желдеткіш орнатылғаны өз алдына.
Еліміз жыл өткен сайын астықты державаға айналып келе жатқан шақта ауылшаруашылық техникасы қаншалықты қажет екендігі айтпаса да түсінікті. Сондықтан серіктестіктің Тәуелсіздік мерекесі алдындағы бұл талпынысын құптамасқа болмайды.
Дәулет СЕЙСЕНҰЛЫ, Семей.