Кеше «Қазақстан» орталық концерт залында «Нұр Отан» халықтық-демократиялық партиясы Астана қалалық филиалы саяси кеңесінің кеңейтілген отырысы өтті. Оған Астана қаласының әкімі, «Нұр Отан» ХДП Астана қалалық филиалының жетекшісі Иманғали Тасмағамбетов төрағалық етіп, жүргізіп отырды.
И.Тасмағамбетов кіріспе сөзінде алдағы сайлаудың саяси маңыздылығын атап көрсетсе, күн тәртібінде екі мәселе қаралды. Бірінші мәселе бойынша филиал төрағасының бірінші орынбасары Әмірхан Рахымжанов «Нұр Отан» халықтық-демократиялық партиясы Қазақстан. 2017. Мақсаттары. Ұлттық іс-қимыл жоспары» тақырыбында баяндама жасады. Шешен өз сөзінде жаңа парламенттік мерзімге арналған саяси тұғырнама жобасы Президент Н. Назарбаев белгілеп берген «2020 Стратегиясын» іске асырудың қарышты қадамы, заңды жалғасы болып табылатынын атап көрсетті. Тәуелсіздік алған 20 жыл ішінде Қазақстан өзіндік даму жолына түсіп, экономикалық қуатты елге айналды. Жасампаздық пен қарышты өрлеуіміздің бірден-бір кепілі болып табылатын Елбасымыздың басшылығындағы «Нұр Отан» ХДП ұзақ мерзімді жылдарды қамтитын бағдарламасын сәттілікпен жүзеге асырып келеді. Осы мерзім ішінде жетекші саяси күшке айналып, бүкілхалықтық қолдауға ие болды. Салмақты да сындарлы шешімдері қоғамның ілгері дамуына барынша ықпал жасап, реформалардың дәйектілікпен жүзеге асуына зор үлес қосып келеді, деді. Одан әрі кез келген сайлаудың түпқазығы, жеңіске жетудің басты кепілі сайлауалды бағдарлама болатынын сөз ете келіп, «Нұр Отанның» 2012 жылғы 15 қаңтарда болатын Парламент сайлауына арналған бағдарлама жобасының өзекті тұстарына тоқталды. Астаналықтар қашанда Президенттің сенімді тірегі болып қала бермек, деп түйіндеді өз сөзін Ә.Рахымжанов.
Жарыссөзге бірінші болып көтерілген «Астана локомотив депосы» АҚ-тың машинист-нұсқаушысы Владимир Ульяненконың сөзін залдағылар зейін қоя тыңдады. Тәжірибелі жұмысшы өз ойын қарапайым тілмен жеткізіп, жиналғандар назарын инновациялық-индустриялық жобалардың орындалу жайына аударды. Локомотив өмірінен мысалдар келтіріп, тағы бір озық бағдарламаның қолға алынғанын жеткізді. «Көз – қорқақ, қол – батыр» деген сөз бар. Күш біріктірсек, алмайтын асуымыз болмайды. Көш басынан әркез нұротандықтарды көріп келеміз. Олар мұндай құрметке лайық, деді ол. № 54 мектеп-гимназиясы орыс тілі пәнінің мұғалімі Альбина Көпеева саяси ұйымдағы жастар рөліне тоқталса, «Ұлттық медицина холдингі» АҚ басқарма төрағасының орынбасары Тамара Вощенко медицина жайын сөз етті. Еуразия ұлттық университетінің ректоры Ерлан Сыдықов партияның алдағы жылдарды қамтитын тұғырнамасында ішкі-сыртқы ұстанымдардың нақты көрсетілгенін айта келіп, ертеңгі күні еліміздің қандай жолмен дамитыны біздің әрқайсымызға тікелей байланысты деген ой тастады.
Екінші мәселеде «Нұр Отан» ХДП кезектен тыс ХІV сьезіне делегаттар сайланды.
Саяси кеңестің кеңейтілген отырысын И.Тасмағамбетов қорытындылады. Ол аса маңызды саяси науқан бір реттік шара еместігін, алдағы жүйелі іс-қимылдарды түзіп беретінін, сол себепті әр нұротандықтан асқан жауапкершілікті, жинақылықты, саяси көрегенділікті қажет ететінін атап көрсетті. Елорданың әлеуметтік-экономикалық дамуы жыл өткен сайын жоғары қарқынмен дамып келеді. Биыл ішкі жалпы өнім 360 миллиард теңгені құрап отыр. Өнеркәсіп өнімдерін шығару 150 миллиард теңгеге жетті. 400 миллиард теңгенің инвестициялары тартылды. Орташа айлық жалақы 122 мың теңгеден айналды. Әлеуметтік бағдарламалар партияның айрықша қадағалауына алынған.
Саяси кеңес отырысына «Нұр Отан ХДП Саяси кеңесі бюросының мүшесі, Экономикалық даму және сауда министрі Қайрат Келімбетов қатысты.
Өмір ЕСҚАЛИ.