Нөмірде осындай айдар бойынша әр жылдары «Егемен Қазақстан» газетін басқарған азаматтардың сөздері берілген. Бұл мақалалар негізінде белгілі бір сауалдар бойынша ұйымдастырылғаны сезіледі. Мәселен, газеттің 1960-1969 жылдарғы редакторы болған Кеңесбай Үсебаевтың мақаласы «Ағалар ісі үлгі болсын» деп аталса, газетті 1973-1983 жылдары басқарған Сапар Байжановтың мақаласы «Әр газеттің өз даңғылы болмас па?..» деп аталған. Басылымға 1983-1986 жылдары редакторлық еткен Балғабек Қыдырбекұлының мақаласы «Қазіргідей еркіндік жоқ еді» деген тақырыппен берілген. 1987-1989 жылдарғы бас редактор Көрік Дүйсеев өзі басқарған кезді «Қиын да қызықты жылдар» деп еске алса, 1989-1992 жылдарғы бас редакторы Шерхан Мұртаза ағамыз өз лебізін «Үш күндей өте шыққан үш жыл» деп еске алыпты. Ал 1992-93 жылдарғы бас редактор Әбіш Кекілбаев ағамыз «Газетке азаматтық сипат қажет» депті.