Кешкі қалалық газеттерде болмаса, таңертең жарық көретін күнделікті басылымдарда «бүгін...» деп сөйлеу салты қабылданбаған. Өйткені, таңертеңгілік газеттер әдетте ең жедел дегенде кешегі күннің кешкі оқиғалары жайында жазады. Ал бұл жолы біз бүгін, яғни 30 қарашада жеткен хабарды жариялағалы отырмыз.
Түнгі сағат 1-ге жақын қалғанда, «Егемен Қазақстанның» беттеріне қол қойылғалы жатқан шақта Бельгия астанасы Брюссельден сүйінші хабар алдық.
Қазақстанның әлемге кеңірек танылуына септігін тигізетін, еліміздің даңқын асыратын тағы бір жақсы жаңалық келіп жетті: Университеттік спорттың халықаралық федерациясы (FISU) 2017 жылғы Универсиаданы Алматы қаласында өткізу жөнінде шешім қабылданғанын жария етті. Бұл оқиға Еуропа уақытымен кешкі 19-да, Астана уақытымен түнгі 12-де болды. Сол кезде FISU президенті Клод-Луи Гальен Алматы қаласының әкімі Ахметжан Есімовке 2017 жылғы Универсиаданы өткізу құқын жеңіп алған қаланың сертификатын табыс етті.
Маңызы мен ауқымы жөнінен Олимпиялық ойындардан кейінгі екінші орында тұратын бұл жаһандық жарысты өткізуге таласушылардың соңғы мәресіне екі қала шыққан еді. Оның бірі Алматы, екіншісі Италияның Тренто қаласы болатын. Кеше Алматының анық артықшылығына және елдегі экономикалық дағдарысқа байланысты Италия үкіметі Универсиадаға Тренто кандидатурасын алып тастау жөнінде шешім қабылдағаны хабарланды. Сондықтан Алматының 2017 жылғы Универсиада астанасы атануы автоматты түрде жүзеге асты.
Ахметжан Есімов Брюссельде Алматының өтінім комитетінің тұсаукесері кезінде бұл шешімге байланысты қала басшылығы Универсиаданы ең жоғары деңгейде өткізуге бар күшін салатынын айтты. «Бұл үшін бізде барлық жағдай бар. Біріншіден, Қазақстан Президенті Нұрсұлтан Назарбаевтың тарапынан қолдау көріп отырмыз. Әлемдегі дағдарысқа қарамастан, біздің еліміз қарқынды дамып келеді. Біз Азиадаға барлық халықаралық стандарттарға сай келетін жаңа спорт нысандарын тұрғыздық. Оған FISU комиссиясы жоғары баға берді. Бұған қоса біз 2017 жылғы ойындарға дейін жаңа мұз сарайын саламыз», деді Ахметжан Смағұлұлы тұсаукесерде.
FISU президенті Клод-Луи Гальеннің Қазақстанға, Алматыға қатысты айтқан сөздері әрбір отандасымызды мерейлендіреді деп ойлаймыз.
«Мен Алматы Универсиадасы тамаша өтетіндігіне сенімдімін. Өз тарапымнан бұған барлық қолдауымды көрсетемін. Енді сіздің еліңіз Универсиададан кейін не болатынын ойлай бастауы керек. Сіздердің Қысқы Олимпиялық ойындарды өткізуге өтінім беруге толық мүмкіндіктеріңіз бар деп ойлаймын», деді кеше FISU президенті.
Айтқаны келсін!
Тәуелсіздігіміздің жаңа табысы құтты болсын, ардақты ағайын!