Мемлекеттік хатшы Гүлшара Әбдіқалықова Түркиядағы қазақ диаспорасы жастарымен кездесті. Бұл іс-шара Астананың 20 жылдық мерейтойына орай олардың атажұртты көріп қайтуы мақсатында ұйымдастырылды.
Мемлекеттік хатшы өз сөзінде Елбасы Нұрсұлтан Назарбаевтың жастарға: «Болашаққа деген біздің үкілі үмітіміз – сіздер. Біздің бүгін жасап жатқанымыздың барлығы – сіздер үшін жасалуда», деп айтқанын атап өтті.
«Азаттық алған соң бүкіл Тәуелсіз мемлекеттер достастығы елдері арасынан алғашқы болып, 1997 жылы 2030 жылға дейінгі даму жоспарын әзірлеп, оны 15 жыл ішінде орындадық. Қазір біз «Қазақстан-2050» Стратегиясын жүзеге асырып жатырмыз. Оның басты мақсаты – әлемдегі озық 30 елдің қатарына қосылу. Осы орайда елде институттық 5 реформа жарияланып, Ұлт жоспары, үшінші жаңғыру аясында ауқымды жұмыс жүргізіліп жатыр», деді Г.Әбдіқалықова.
Сондай-ақ Мемлекеттік хатшы шетелдегі қандастар мәселесіне, ана тілі мен төл тарихына, мәдениеті мен руханиятына, ұлттық құндылықтарды сақтауға қолдау көрсетуге, тығыз әлеуметтік-экономикалық байланыс орнатуға Президенттің баса назар аударатынын жеткізді. Қазақстанның қандастарды елге жинау жөнінде Германия және Израильмен бір қатарда тиімді этностық көші-қон саясатын жүзеге асырып отырған елдің бірі екенін атап өтті. Осындай жұмыстың нәтижесінде тәуелсіздік алғалы бері елімізге миллионнан астам қандасымыз оралды. Қазіргі кезде Қазақстаннан тыс жерлерде, шет мемлекеттерде 5 миллионнан астам қазақ диаспорасы өкілі бар.
Бүгінде Түркияда шамамен 10 мыңдай қазақ тұрады. Диаспора өкілдеріне өзекті мәселелер бойынша көмек көрсету мақсатымен «Қазақ-түрік қоры», «Қазақ түркілерінің әлеуметтік және мәдени дамуын қолдау қоры», «Ахмет Ясауи қоры», «Қазақ-түрік білім, ғылым және зерттеу қоғамы» тиімді жұмыс жүргізіп отыр.
Кездесу соңында Мемлекеттік хатшы Түркиядағы қазақ диаспорасы жастарының оқуда жақсы нәтижеге қол жеткізіп, өмірде табысты және бақ-берекелі болуына тілектестік білдірді.
Абай АСАНКЕЛДІҰЛЫ,
«Егемен Қазақстан»