Облыс орталығындағы саябақта жыл сайын «Бір отбасында тұрамыз» атты жазғы фестиваль өтеді. Биыл достық тойы Астананың 20 жылдығына арналды. Мерекені болгар ашса, эстафетаны «Эльбрус» қарашай-черкес және қабарда-балқар этномәдени бірлестіктері жалғастырды.
Келесі кезекте саябақта Корей этно-мәдени бірлестігінің өкілдері қалалықтарды мерекелік бағдарламаларына шақырды. Мерекеге өңірдегі Успен, Павлодар аудандарындағы бірлестік бөлімшелері, Алматыдағы Корейлер орталығынан келген құрметті қонақтар қатысты.
Бұл күні саябақта корей әндері мен билерінің концерттік бағдарламасы көрсетіліп, ерекше қолөнер туындыларының көрмесі ашылды. Қала тұрғындары мен қонақтары корей халқының ұлттық тағамдарынан дәм татты. Бүгінде өңірде 24 этномәдени бірлестік қызмет жасайды. Солардың қатарында «Қазақстан корейлері ассоциациясы» қоғамдық бірлестігінің облыстық филиалы да бар.
Облыстық филиал төрағасының орынбасары Раиса Афанасьева-Кимнің айтуынша, біздің өңірде қазір 1000-ға жуық корей өмір сүруде. Бүгінде қауымдастық Қазақстан-Корея білім беру орталығымен тығыз байланыс орнатқан. Орталық бірлестік мүшелеріне корей тілінде кітаптар, оқулықтар жолдайды. Еліміздегі Корея елшілігінің мәдени орталығымен бірлесе қызмет жасап келеді.
Раиса Кимнің айтуынша, жалпы, қазақтар мен корейлерді жақындастыратын ортақ рухани-мәдени байланыстар да аз емес. Мысалы, қазақтың домбырасы мен жетігеніне ұқсас ұлттық аспаптары корей халқында да бар. Корейлер де баланың тұсауын бір жасқа толғанда кесіп, туыстарды дастарқан басына жинайды екен. Кейбір сөздеріміз де ұқсас. Біздегідей үлкендерге құрмет көрсету тәрбиесі қалыптасқан.
Ал, бірлестіктің бір ерекшелігі, оның құрамында корейлермен қатар, қазақ, орыс, грузин сияқты ұлт өкілдері де бар. Оларды корей халқының өткен тарихы, мәдениеті, әндері, билері, тағамдары қатты қызықтырады екен. Корей халқының Жаңа жыл мерекесі-Сольнальды да бірге тойлайды. Мерекені табиғаттың жаңаруымен, көктемнің келуімен байланыстырады. Балалардың ата-аналарын мерекемен құттықтау салты «себэ» деп аталады. Үлкендер ұлттық киімдері ханбокты киіп, оларға «токтам» салтымен бата береді. Концерт жүргізушілері осы және тағы басқа әдет-ғұрыптар жөнінде баяндап, кейбіреулерін сахнада көрсетті.
– Елімізде тұратын әрбір ұлт өкілдері қазақ халқының салт-дәстүрін білуі тиіс деп есептеймін. Бұл – сыйластық белгісі. Жергілікті университет студенттері Нарзангүл Канапина, Қымбат Мұқанова мысалы, корей әндерін орындайды. Өзгеге деген құрметтің, өзара ынтымақтың арқасында ұлттар арасында достық қарым-қатынас осылай сақталып келеді. Астанамыз осы бақытты бірліктің символы, – дейді Раиса Афанасьева-Ким.
Саябаққа жиналған жұртшылық Гүлнәр Ауталыпова көркемдік жетекшілік ететін «Аньен» ансамблі орындаған корей ұлттық билерін қызықтады.
Саябақтағы концерттік бағдарламада этномәдени бірлестік құрамындағы «Кымпитсори» вокалдық тобы, «Анён» хореографиялық ұжымы, «Би юникс» би ансамбльдері тамаша өнер көрсетті.
Фарида БЫҚАЙ, «Егемен Қазақстан»
ПАВЛОДАР