Жаңаөзенде, одан кейін Шетпе стансасында болған оқиғалар қай-қайсымызды да бейжай қалдырмайтыны сөзсіз. Мұндай келеңсіздіктің Тәуелсіздік мерекесі күні орын алуы өкінішті, әрине. Өздері тұратын қаладағы көрнекті нысандарды өртеп, тонауға барған адамдардың әрекетін ақтау қиын. Тойымыздың шырқы неге бұзылды? Бұл азамат ретінде әркімді де ойлантатыны сөзсіз. Қандай да шешімін күткен өзекті мәселелерді бұлай ушықтырмай-ақ шешуге болатын еді деп ойлаймын. Қақтығыстар халықтың қамын ойлағандық болмайды. Алайда, осындай оқыс оқиға орын алды, енді оның зардабын жеңілдетудің жайын ойлау қажет. Осы бағытта Елбасы мен Үкімет шұғыл шешімге келіп, қайғыны сейілту шараларын алып жатыр. Бұл бір күнде жазылатын жан жарасы емес, дегенмен қайғыны бөліссең жеңілдейді дейді халқымыз. Сондықтан жаңаөзендіктерге көмек қоын созудан ешкім сырт қалмақ емес. Қазір Мемлекет басшысы мен Үкіметтің қадамдары осы бағытта өрбігені көңілге медет.
Елбасы тапсырмасымен құрылған Үкіметтік комиссия осы күндері жағдайды тұрақтандыру бағытында біраз жұмыстар атқарды. Үкіметтік комиссия жеті топ бойынша жұмыс істеп, нысандарды қалпына келтіру, әлеуметтік қамтамасыз ету, азық-түлікпен қамтамасыз ету, халықты ақпараттандыру, құқықтық қамтамасыз ету бағытында көп шаруалар тындырды. Үкіметтің Жаңаөзендегі тәртіпсіздіктердің зардабын жоюға және қаланы қалпына келтіруге арнайы шаралар жоспарын бекіткенін, осы мақсатқа 3 миллиард теңге бөлінгенін естіп, құлазыған көңілімізге сенім ұялады. Жекеменшік нысандарды қалпына келтіруге де қаржы қарастырылмақ.
Елбасы Нұрсұлтан Назарбаевтың Маңғыстау облысына арнайы барып, актив өткізуі де бұл мәселенің аса маңызды екенін көрсетеді. Бұзақы топтың іс-әрекеттеріне себепші болған «Өзенмұнайгаз» компаниясы жұмыстан босатылған жұмысшылардың арасындағы еңбек дауын дұрыс шешпеген «Самұрық Қазына» қоры мен «ҚазМұнайГаз» компаниясының басшыларын ауыстыруы арқылы мұндай жағдайға соқтырғандардың ешқайсысына кешірім болмайтынын аңғартты. Жаңаөзендегі кездесуде де Елбасы ұлы Абайдың «Халық бірлігі біздің ең басты құндылығымыз» деген сөзін тағы бір еске салды. Нұрсұлтан Әбішұлы, елдің өзге өңірлерінің қаланың қираған нысандарын қалпына келтіруге ұмтылып отырғанын атап өте келіп, отандық кәсіпкерлердің қираған нысандарды қалпына келтіруге ықпал ететінін жеткізуі қиындықты бірігіп көтеруге жұмылған қазақстандықтардың ойын дөп басты десе болады. Елбасы осы жұмыстарды өте қысқа мерзімде орындауды Үкіметке қадап тапсырды. Президент әрбір жаңаөзендіктің үдемелі индустриялық-инновациялық даму бағдарламасы аясында ашылған кәсіпорындарда жұмысқа орналасуға мүмкіншілігі бар екенін ашып айтты. Бұл жаңаөзендіктер үшін күрмеуі қиын мәселені шешуге алғышарт жасайтыны сөзсіз. Біздер, қазақстандықтар, Жаңаөзеннің болашағына үлкен сеніммен қараймыз. Мемлекет жергілікті жердегі халықтың жұмыспен қамтылуына, әлеуметтік мәселелерінің шешілуіне байланысты бағдарламалар қабылдап, кешенді шаралар алып жатыр. Біз қашанда бірлікті, тыныштықты қалаған халықпыз. Бұл келеңсіздіктер болашаққа сабақ болады, бұдан қорытынды шығарылады. Қандай жағдайда да ағайын арасының татулығын ойлаған қазақ халқы өзара түсіністікке, бірлік пен ынтымаққа ұйытқы болады деп сенемін. Бұл менің ғана пікірім емес, серіктестіктің өндірістік директоры Марат Итеғұлов бастаған 60 адамдық тауарлы-сүт фермасы ұжымының ойы. Бізге алаңсыз еңбек етіп, тыныш өмір сүріп, ұлағатты ұрпағымызды өсіруіміз керек.
Әлмұрат ҚОСМАҒАМБЕТОВ, «АЙС» ЖШС тауарлы-сүт фермасының бас зоотехнигі.
Ақтөбе облысы.