«Қызылжар өңірінде қатты отын тапшылығы орын алып отыр, көмір бағасы өсіп кетіпті» деген алыпқашпа сөздің шындыққа жанаспайтынын облыстық энергетика, тұрғын үй және коммуналдық шаруашылық басқармасының басшысы Әділбек Әубәкіров жоққа шығарды.
Ол БАҚ өкілдеріне берген түсініктемесінде мұндай олқылықтар былтыр орын алса, биыл күні бұрын қам жасаудың арқасында әлеуметтік нысандар қажетті 146 мың тонна көмірмен қамтамасыз етілгенін жеткізді. Қазір 34 темір жол тұйығында 60 мың тоннадан астам көмір жинақталған. № 2 Петропавл жылу электр стансасында 175 мың тонна қара отын, 664 тонна мазут қоры бар. Облыс тұрғындары қысқы маусым кезінде орташа есеппен 384 мың тонна көмір тұтынса, бүгінде бұл көлемнің жартысына жуығы жеткізілді.
Кен орындарынан көмір жеткізумен жергілікті 4 фирма айналысатындықтан, бағада айтарлықтай айырмашылық жоқ. Темір жол тасымалының бағасы екі рет көтерілуіне байланысты аз-кем қымбаттағанымен қолжетімді. «Турдыоглы» жеке кәсіпкерлігінің менеджері Мұратхан Тұрмағамбетовтың айтуынша, Екібастұз көмірінің бір тоннасы – 8600, Майкөбенікі – 12200, Шұбаркөлдікі 13950 теңге тұрады. «Соңғы сұрыпқа сұраныстың жоғары екенін ескеріп, оның ай сайынғы мөлшерін 8 мың тоннаға дейін өсіретін боламыз. Қазір 4 мың тоннасы әкелініп, күніне 200-350 тоннадайы саудаланады. Бұған көмір тиелген 14 вагонды, ал қыркүйекте кесте бойынша 70, қарашада 120 вагон көмір жеткізілетінін қоссақ, қыстан қысылмай шығатынымыз анық», дейді М.Тұрмағамбетов.
Бұдан тысқары «Уголь Норд», «Отын LTD» серіктестіктерінің қоймаларында 10 мың тонна көмір еш кедергісіз сатылуда. Бұдан бір тонна көмірдің бағасы 17 мың теңгеге дейін көтерілді деген сөздің ақиқат ауылынан алыс екенін бағамдауға болады.
Өмір ЕСҚАЛИ,
«Егемен Қазақстан»
Солтүстік Қазақстан облысы