Парламент Сенатының депутаттары Динар Нөкетаева, Төлеубек Мұқашев және Дулат Құсдәулетов Алматы қаласында жұмыс сапарымен болып, Елбасының Жолдауын түсіндіру мақсатында Алматы ауыр машина жасау зауытының еңбек ұжымымен кездесті.
Сенаторлар зауыт ішін аралап, жүргізіліп жатқан жұмыстарды көріп, шешімін таппай жатқан кейбір мәселелерді Үкіметтік деңгейде көтеретіндерін жеткізді. – Біздің мұнда келудегі негізгі мақсатымыз – отандық өндірісті қолдау, сондай-ақ кәсіпорын басшыларымен тілдесіп, қандай өзекті мәселелері барын білу. Кейбір шенеуніктер мұндай өндіріс орындарына келмейді. Ал біздің кәсіпкерлер кафе-бар, мейрамхана, қонақүйлер салуға әуес. Жастарымыз аз ақшаға даяшы, күзетші, көлік жуушы болып жұмыс істеп жүр. Одан да біз отандық өндірісімізді қолдап, қолдан келгенше көмектесіп, жастарды осында жұмысқа тартуға үгіттеуіміз керек, – деді Сенат депутаты Төлеубек Мұқашев. Құю цехында істейтін жұмысшылардың орташа жалақысы 364 000 теңгені құрайды екен. Зауытта 870 адам жұмыс істейді. Сенаторлар Абай атындағы Қазақ ұлттық педагогикалық университетінде және отандық ұлттық киім үлгілерін шығаратын «Ерке-Нұр» кәсіпорнында да болды.
Талғат СҮЙІНБАЙ,
«Егемен Қазақстан»
АЛМАТЫ