1 наурыз күні Астананың «Барыс» командасы Құрлықтық хоккей лигасындағы плей-офф бәсекесінің алғашқы кездесуін өткізді. Өкінішке қарай, Ресейдің Магнитогорск қаласында жергілікті «Металлург» клубымен кездескен астаналықтар алаң иелерінен 3:2 есебімен ұтылып қалды.
1 наурыз күні Астананың «Барыс» командасы Құрлықтық хоккей лигасындағы плей-офф бәсекесінің алғашқы кездесуін өткізді. Өкінішке қарай, Ресейдің Магнитогорск қаласында жергілікті «Металлург» клубымен кездескен астаналықтар алаң иелерінен 3:2 есебімен ұтылып қалды.
Жалпы, бұл матчтың тең дәрежеде өткенін айтуға болады. Кездесуде «Барыстың» ойыншылары қорғаныста қалып қоймай, жиі-жиі шабуылдарға шығып, бүкіл ойын бойы қарсыластар қақпасына қауіп төндірумен болды. Дегенмен, ойында алғашқы болып алаң иелері есеп ашты. Матчтың 37-ші минөтінде Сушинский шайбаны Еремеев қорғаған қақпаға тоғытса, одан кейін Бут 40-ші минөтте екінші шайбаны соқты.
Осыдан кейін намысқа тырысқан қонақтар сапындағы Пушкарев 43-ші минөтте есепті қысқартты. Осы шайбадан кейін көзді ашып-жұмғанша алаң иелерінен Бондарев тағы бір шайба салды. Ал ойынның нүктесін біздің команданың сапында ойнайтын чехиялық легионер Крепс қойды. Ол 54-ші минөтте екінші шайба соғып, есепті 3:2-ге қысқартты. Одан әріге «Барыстың» шамасы жетпеді.
Кеше кешкісін Магнитогорск мұз айдынында плей-офф кезеңінің екінші кездесуі өтті.
Құрлықтық хоккей лигасының плей-офф кезеңінде «Барыс» хоккей клубы «Шығыс» тобында 6-шы орынды иеленген еді. Оның қарсыласы – Магнитогорскінің «Металлургі» осы топта 3-ші орын алған болатын.
Екі команда арасындағы келесі екі кездесу енді 4 және 5 наурыз күндері Астанада өтеді.
Дастан КЕНЖАЛИН.