Елімізге белгілі спорт журналисі, «Егемен Қазақстан» газетінің ардагері, жазушы-журналист Оңдасын Елубайдың «Дүниені дүбірлеткен жеті дода» атты жинағы жарық көрді. Бұл кітап «Қазақ спорты» газетінің 60 жылдығына арналған.
Оңдасын Елубайдың бұл еңбегінде жеті Олимпия ойындарына қатысып, көзбен көріп, санасына түйген жайттары қағаз бетіне түскен. Қолымызға тиген «Дүниені дүбірлеткен жеті дода» кітабын парақтай отырып, қазақ спортының еліміз тәуелсіздік алған жылдарында қол жеткізген табыстарына, кейінгі толқын жас ұрпаққа үлгі-өнеге болатын, олардың бойында отансүйгіштік қасиеттерді, патриоттық сезімдерді қалыптастыруға арналған шығарма екеніне көз жеткіздік.
Автор қазақ елі саңлақтарының соңғы жеті Олимпиадада қол жеткізген табыстары мен кемшіліктері туралы ой бөліседі және өзі түсірген суреттерін ұсынады. Бұл жинақ әсіресе спортты жанына серік еткен жеткіншектерге, студент жастарға, спорт жанкүйерлеріне пайдалы. 368 беттен, 500-ден аса суреттен тұратын кітаптың тілі жатық, оқуға жеңіл.
Кітапта автор тек спорт туралы ғана емес, өзі барған жеті мемлекеттің, яғни Аустралия, Ұлыбритания, Қытай, Италия, Ресей және Оңтүстік Корея мемлекеттерінің тарихын, экономикасы мен мәдениетін, тарихи жетістіктерін жазып, оқырманмен ой бөлісуді де ұмытпаған.
Әли БИТӨРЕ,
«Егемен Қазақстан»