Тумысынан айрықша талантты Саққұлақ би 15 жасында дауға араласып, әділ билік айтып, төрелік еткен. Сол замандағы қисапсыз дүниеден, рухани мол мұрадан кейінгіге қалғаны жұқанасы ғана. Мәселен, Саққұлақ бидің Шоқанға берген батасы, «Ақыл», «Төрт нәрседен қашық қыл», «Бұл да бір ғалымның бірі еді-ау», «Шыңғысқа көңіл айтуы», «Ғылым», «Байдалы биге айтқаны», «Мұсаның ажалында айтқаны» тәрізді мәнді де мәйекті сөздері сақталып қалған. Шешен сөзінде терең философиялық ой, білім, өмірге деген құштарлық, елдік пен ерлікті көксеу жатыр.
Өзінің ел бірлігін сақтау, кейінгі ұрпақты ғана емес, замандастарын да әділдікке, адалдыққа, арлылыққа тәрбиелеу бағытында айрықша еңбек еткен Саққұлақ би 1888 жылы өмірден озады. Шаңырағында жеті ұл дүниеге келген. Олардың ішінде әке жолын қуғаны Нұралы мен Ералы есімді балалары.
Сайын сахара төсінде әділдік туын желбіреткен, қара қылды қақ жарған жарықтық Саққұлақ бидің кесенесі шикі кірпіштен салынған, сегіз қырлы күмбез пішінде. Сегіз бұрыштың оңтүстік батыс жағында төменгі екі қатардың кірпіші сәл-пәл бұзылған екен, қалған қабырғалары тұтас сақталған. Ұрпақтарының аты жазылған ескі тастың жанындағы қабырғаның тұсында Саққұлақ бидің өзінің және екі ұлының аттары таңбаланып, қабір үстіне ескерткіш орнатылған.
Әр белесі көне тарихқа бөгіп жатқан ежелгі Ереймендегі елдің кешегі өткен күнін, оның жақсысы мен жайсаңының ізгі мұратын айғақтайтын көне кесене қазіргі күні де өкпек жолаушыға ой салып, қияннан көзге түседі.
Ақмола облысы,
Ерейментау ауданы