8 маусымда АҚШ-тың Нью-Йорк қаласындағы әйгілі «Madison Square Garden» аренасында Қазақстанның әйгілі кәсіпқой боксшысы Геннадий Головкиннің әлі ешкімнен жеңілмеген канадалық Стив Роллспен күш сынасатыны белгілі.
Осы кеште шаршы алаңға шығатын еліміздің тағы бір өрені – Әли Ахмедовтың кіммен жұдырықтасатыны белгілі болды. Екінші орта салмақтағы жерлесіміз тәжірибелі Абрахам Ханмен айқасады. 34 жастағы АҚШ-тың өкілі 2007 жылдан бері кәсіпқой рингте өнер көрсетуде. Сол аралықта 31 кездесу өткізіп, 26 рет жеңіске жетті. 16 қарсыласын айқын басымдықпен ұтты. 4 рет ұтылып, тағы бір бәсекеде тең есеп тіркелді. Хан UBF нұсқасы бойынша алтын белбеудің иегері.
Сондай-ақ, Нью-Йорктегі бокс кешінде Геннадий Головкин мен Әли Ахмедовтен бөлек, Қазақстанның тағы бір даңқты былғары қолғап шебері Данияр Елеусінов те өнер көрсетеді.