– Республикалық сайыс қашықтық арқылы өткізілді, – дейді Елизавета. – Бір өкініштісі, жалғыз балым жетпей қалды. Бірақ одан ұнжырғам түскен жоқ, қайта әлі де кем түсіп жатқан олқылығымды ой елегінен өткізіп, тіл ұстарту жұмыстарын үдете түстім. Маған қазақ тілі өте ұнайды. Біз үйде алты баламыз, қазақ тілінде сөйлейтін мен ғана. Тіпті әке-шешем де біле қоймайды. Ал мен болсам бірінші сыныптан бастап тіл үйренуге ұмтылдым. Қазір неге екенін де түсіндіріп бере алмас едім. Әйтеуір ынта-ықыласым зор.
Тілге құмар қыздың тіршіліктегі мақсат-мұраты да кісі қызығарлық. Орта мектепті аяқтаған соң Көкшетау қаласындағы Шоқан Уәлиханов атындағы мемлекеттік университетінің филология факультетіне түспек. Сөйтіп қазақ тілі мен әдебиетінің маманы болып шықсам дейді. Әдебиет туралы әңгіме өз алдына, ұлы Абайдың «Ескендір», «Масғұт», «Әзімнің әңгімелері» поэмаларын жатқа оқитын жас қыз өз өлеңдерін оқып берді. Балауса сезім, мөлдір мұң. Табиғат, кейбір құрбылары жайындағы тырнақалды туындылары. Ал қазақ поэзиясының көрнекті өкілдерінің көптеген өлең-жырларын жатқа оқиды екен. Оқығанда да ешбір акцентсіз, кәдімгі қалың қазақтың ішінде өскен қазақ баласы тәрізді. Тіпті тілінде бір мүкіс жоқ.
Қазақ тілінен ұстазы Анар Қожахметова сабақ береді. Тілге деген махаббатын оятқан, құштарлығын арттырған да осы ұстазы. Әрине, бұл жерде өзінің ынта-ықыласы да айтарлықтай рөл атқарғаны күмәнсіз. Қалай болған күнде де, қазақ тілінде жатық, ұғынықты сөйлеп тұрған жас қыздың талабы тас жарғандай.
– Құрбыларымның көбі қазақтың қыздары. Солармен көбірек сөйлесіп, тіл жаттықтыруға тырысамын. Көшеде де ата-әжелермен қазақша сөйлесемін. Мені танымайтындардың көбі таңырқап жатады. Көршілеріміз де қазақтар. Олар менің өз тілдерінде сөйлесетінімді жақсы біледі. Сол үшін әрдайым құрмет көрсетіп жатады, – дейді Елизавета.
Тілімізді құрметтеген қаршадай қыздың ел құрметтер кезеңі алда. Арман асуына шығып, қазақ тілі мен әдебиетінің мұғалімі болып жас ұрпақты тәрбиелеген кезде ең үлкен құрметтің көрсетілеріне сенеміз. Ақмола облысы, Біржан сал ауданы