Оның жарқын бір үлгісіне жуырда Өзбекстан Республикасының Хорезм облысымен нақты әріптестік келісімге қол жеткізіліп, алғашқы қадамдар жасалғанын айтқан жөн. Аймақ басшысы Құмар Ақсақалов «ауылы аралас, қойы қоралас» іргелес көрші елден келген делегацияны қабылдап, берік байланыс орнату сындарлы кездесудің негізгі өзегіне айналды. Құмар Іргебайұлы өз сөзінде Қазақстан Өзбекстан үшін сенімді стратегиялық әріптес екенін атап өтті. «Біз өңірлік деңгейде жұмыс істеуге әркез әзірміз. Бірлескен жобаларды жүзеге асырудың мүмкіндіктері мол. Қызылжардың топырағы құнарлы. Жылына шамамен бес миллион тоннадай сапалы астық жиналады. 2017 жылға қарағанда Өзбекстанмен сауда-саттық көлемі 55 пайызға ұлғайды. Көбіне бидай экспортталады. Ол жақтан мақта-мата өнімдері, жеміс-жидек тасымалданады», деді ол.
Хорезм облысы хокимінің бірінші орынбасары, делегация жетекшісі Кудратбек Игамбергеновтың айтуынша, облыс Орта Азиядағы ең көне аймақтардың бірі саналады. Көлік инфрақұрылымы жақсы өркендеген. Жемазық, жібек, әйнек, көлік шығаратын кәсіпорындар жұмыс істейді. Сыртқы сауда айналымы биыл 242 миллион долларды құраса, Қазақстанның экспорты 72 млн доллар. Жылына 250 мың тонна мақта, 490 мың тонна бидай, 1 миллион тоннадан астам көкөніс өндіріледі. Үргеніш, Хиуа секілді туристік қалаларды қазақстандықтар жиі тамашалайды.
Қос тараптық жүздесу барысында біріккен өндіріс ошақтарын салу, кәсіпкерлік салаға тың серпін беру мәселелері де кеңінен талқыланып, бірқатар ынтымақтастық құжаттарға қол қойылды.
Екі өңірдің бизнес өкілдері қатысқан алқалы басқосуда облыс әкімінің бірінші орынбасары Марат Тасмағанбетов ірі компанияларды сенімді әріптес болуға шақырды. Майлы дақылдар алқабы бір миллион гектарға жетіп отыр. Жылына 555 мың тонна сүт, 56 мың тонна ет өндіріледі. Осыншама көл-көсір шикізатты өңдумен айналысатын кәсіпорындар аз, дей келіп, Марат Иманбайұлы инвестициялық ахуалы қолайлы өңірдің артықшылықтарына, жеңілдікті субсидиялар жайына тоқталып өтті. Хорезм облысы инвестициялар және сыртқы сауда бас басқармасының басшысы Анвар Даулетов еркін экономикалық аймақтар құрылғанын, инвесторлар салық пен кедендік алымдардан босатылатынын айтты. «Kazakhinvest» ҰК Солтүстік Қазақстан өңірлік директорының орынбасары Данияр Шалабаев бірнеше проблеманы талқыға салды. Бидайды тереңдетіп өңдейтін, зығыр майын шығаратын зауыттар ауадай қажет. Бізде қант қызылшасын өсіруге барлық алғышарттар бар.Үйрек етін өндіру арқылы да қыруар табыс табуға болады, деді ол.
«В2В» форматында өткен іскерлік диалогта «Янгибозор Томорқа хизмати» агрофирмасының өкілі Алимбой Мадрахимов облыстан асыл тұқымды ірі қара малы мен қой сатып алатынын мәлімдесе, «Сокирко С.Н.» ЖК директорының орынбасары Елена Кирьякова фирма мектеп формаларын тігумен айналысатынын, бұдан былай жейделер, спорттық киімдер, тағы басқа дайын тауарларды Хорезмге импорттайтындарын жеткізді. Шұлық шығаратын жергілікті «Matex» серіктестігі балалар мен мектеп формаларын тігетін мата, жіп сатып алуға, Хорезм сауда үйін ашуға уағдаласты.
Өзбекстандық кәсіпкерлер облыс орталығында екі күн бойы ауылшаруашылық жәрмеңкесін ұйымдастырып, жеміс-жидек, бал өнімдерін, тоқыма және қыш бұйымдарын қолжетімді бағаға ұсынды. Сатылымға 55 мың тоннадан астам ауылшаруашылық өнімдері шығарылып, қарбыз, қауын, өрік, шабдалы, шиеге сұраныс көп болды.
Солтүстік Қазақстан облысы