Қасым-Жомарт Кемелұлы еліміздің өркендеу жолына өрелі үлес қосқан өте тәжірибелі саясаткер. Мұны ол кісінің Үкімет басқарған кездегі, басқа да жауапты қызметтер атқарған тұстағы сарабдал шешімдерінен, жасаған жұмыстарынан анық көреміз. Мемлекеттің ішкі де сыртқы жағдайын жетік білетін, қоғам ахуалын жазбай танитын тұлға деп толыққанды айтуға болады. Мемлекет басшысына жүктелетін ең негізгі міндет − елдің тәуелсіздігін, қауіпсіздігін қамтамасыз ету. Өйткені Президент сыртқы саясатта осы елдің экономикасы мен тұрақтылығын әрі қарай жетілдіру бойынша барлық істі тікелей өзі жүргізеді. Өзіне мемлекет жауапкершілігін толық жүктейді. Осыны жан жүйесімен сезінген жаңа Президентіміз салтанатты рәсім кезінде сөйлеген сөзінде: «Менің мақсатым – қоғамның бірлігін қамтамасыз етіп, әр азаматтың құқығын қорғау» деп шегелеп айтты.
Қазір әлемдегі халықаралық жағдай аса күрделі кезеңде тұрғанын кез келген көзі ашық азамат білуге тиіс. Екінші дүниежүзілік соғыстан кейін қалыптасқан халықаралық құқық бұзылды. Алпауыт мемлекеттер басқа мемлекеттердің ішкі ісіне араласатын болды. Тіпті күшті державалар өзінен әлсіздерге өктемдік танытып, тізе батыратынды шығарды. Олардың мақсаты өзіне тиімді, ыңғайлы жүйе орнатуға тырысып, тек өз мүддесін қорғайтыны ашық байқалуда. Дүниежүзілік сауда ұйымының беделі түсті. Әр мемлекет өзінің жеке басын күйттеді. Бұл өз кезегінде әлем елдерінің экономикасының өрісін тарылтып, басқа да салаларға салқынын тигізе бастады. Көршілес Ресей Батыстың өте қатаң санкциясына ұшырап отыр. АҚШ-тың қысымы Қытай секілді ірі мемлекеттің экономикалық дамуына да кері әсерін тигізіп жатқанын көріп отырмыз. Оларда да сауда-экономикалық қатынастар күрделене бастады. Әлемде мұндай оқиғалар біздің де экономикамызды айналып өтпейтіні белгілі. Әлемдік нарықта шикізат бағасы төменге құлдилап барады. Мұны күнделікті байқап отырмыз. Осындай күрделі жағдайлар Мемлекет басшысына үлкен жауапкершіліктер жүктейді. Осы секілді халықаралық деңгейдегі күрделі мәселелерді терең сезінетін, ел үшін маңызды шешімдер қабылдай алатын, сол алпауыт елдердің басшыларымен тепе-тең дәрежеде мәміле жасай алатын саясаткердің мемлекет басына келуі халқымызды оңға бастайтын игі іс болды деп есептеймін.
Расында да Қасым-Жомарт Тоқаев елімізді күрделі кезеңнен аман алып өтетін, осы талаптарға барлық жағынан сай келетін тұлға. Тоқаевтың халықаралық саясаттағы биік беделі басқа елдердің бізге тізе батыруына, өктемдік танытуына жол бермейді. Елдегі ішкі жағдай қаншалықты күрделі болғанмен, біз өзіміздің ынтымағымызды арттыра беруіміз керек. Бейбітшілік пен тұрақтылық болса ғана біз кез келген қиындықты оңай еңсере аламыз. Ал ішімізден іріп жатсақ, одан тек барлық сала жапа шегеді. Баға жетпес байлығымыз тәуелсіздік дейтін ұлы тұғырымызды шайқап алмауымыз керек. Президентіміз ұлықтау рәсімінде алға тартқан он міндет елімізді дамудың даңғыл жолына жетелейтін негізгі қадамдар. Осының барлығын жан-жақты саралап жолға қою үшін алдымызда зор жауапкершіліктер тұр. Бұл жұмыстарда Қасым-Жомарт Кемелұлын бірауыздан қолдап, жаңа жетістіктерге бірге қол жеткізуге күш біріктіруіміз маңызды.
Алдымызда нақты қандай проблемалар тұрғанын Мемлекет басшысы жақсы сезініп отыр. Халықтың табысын арттыру, қоғамды жегідей жеген жемқорлық дертінің тамырына балта шабу, кәсіпкерлерді қолдап, олардың іскерлік белсенділіктерін арттыру және қорғау, жаңа жұмыс орындарын ашу, әділ әлеуметтік саясат, сапалы мемлекеттік қызмет көрсету, халықтың қолайлы өмір сүруі үшін таза ауызсумен қамту, жолдарды ретке келтіру мәселелерін басты назарға алып отыр. Дүйім жұрттың алдында ұлықтау рәсімін бірден өткеріп шұғыл іске кірісіп кеткені көңіл қуантады.
Президент тілге тиек еткен бағыттар шын мәнінде мемлекетімізді орнықты дамудың жаңа деңгейіне шығарушы күш екеніне кәміл сенеміз. «Алдағы бірнеше жыл бедерінде заманымыздың басты сұрағы: қандай елдер прогресс сапынан орын алатынына, қайсысы әлемдік дамудың жиегінде қалатынына жауап берілетін болады. Экономикалық, әлеуметтік және саяси прогресс – бұл біздің заманауи сын-тегеуріндерге бірден-бір дұрыс жауабымыз», − деген Тоқаев, әлемдегі жетекші технологияларға ұмтылып, жаһандық дамудың жаңа деңгейіне бет алған мемлекетіміздің алдағы бағыттарын айқындап берді. Талапқа сай, зерделі жастарды жетекші салаларды басқару ісіне тарту идеясы да өте өзекті мәселе деп айта аламыз. Себебі бойында ұлттық намысы қайнаған жасампаз жастар еліміздің жарқын болашағы, тәуелсіздігіміздің негізгі тірегі. Оларды үлкен істерге баулу болашағымызға жасалған игі қадам.
Халықаралық қаржы нарықтарының тұрақсыздануына қарамастан, халықтың табыс көлемін арттыру, табысы жоғары және төмен азаматтардың арасындағы алшақтық сынды өткір мәселені реттеу үшін кешенді шаралар қабылдау қажеттігі кезек күттірмейтін шаруалар. Ең әуелі қоғамға сенім мен келісім керек. Мұның арғы жағында билік пен қоғам арасындағы диалогтың берік орнауы тұрғанын жақсы білеміз. Президенттің осы мәселеге де аса нәзік қарап, баса көңіл бөліп отырғаны орынды шешім. Әлемдік тәжірибеге сүйене отырып, дамудың басты принциптерін негізге алып жұмыс жүргізетін Қасым-Жомарт Тоқаев еліміздің ішкі тұрақтылығы мен дамуын өрге сүйреп, сыртқы саясаттағы жоғары беделін одан әрі биіктете беретініне бек сенейік. Еліміз үшін осынау тарихи кезең баянды болып, жан-жақты жаңғырулар көш түзей берсе деген тілектеміз.
Икрам АДЫРБЕКОВ,
мемлекет және қоғам қайраткері