Бүгін «Назарбаев зияткерлік мектептері» дербес білім беру ұйымында тұңғыш рет шетелдегі қазақ балаларына арналған «Ұлы дала ұрпағы» деген атпен жазғы мектеп ашылды. Үш жақтың күш салуымен ашылған лагерьде Ресей, Иран, Моңғолия, Түрікменстан, Тәжікстан, Өзбекстан және Қырғызстан сияқты елдерден келген 150 жеткіншек екі апта бойы Қазақстан тарихы, ұлттық ән-би, салт-дәстүрден және туған тілден дәріс алады.
«Бұл біздің «Отандастар қоры» және Дүниежүзі қазақтары қауымдастығымен бірлесіп қолға алған тұңғыш жобамыз. Шетелдегі қазақ балаларына қазақ тілін, Қазақстанның тарихын оқытуға академиялық қолдау көрсетіп қана қоймай салт-дәстүрлерімізді көрсететін, ұлттық қолөнерімізбен таныстыратын үйірмелер ұйымдастырып отырмыз. Ең бастысы тәуелсіздік алғаннан бергі еліміздің жетістігін, елордамыз Нұр-Сұлтан қаласының дамуын және құлашын кеңге жайған Қазақстандағы білім беру саласының мүмкіндіктерін көрсетуді мақсат тұттық. Назарбаев зияткерлік мектептерінде тәрбие жүйесіне арналған концепция бар. Соның негізінде ұлттық құндылықтарымызға бағытталған үйірмелер жұмыс істейді. Бұл жолы шетелден келген 150 бала мен өз мектебіміздің 50 оқушысы ұлттық аспаптар, ұлттық қолөнер/Арт-дизайн, робототехника, аэроғарыш, драма сияқты көптеген үйірмелерге қатысады. Бағдарламаға қазақтың «100 күйі», «100 әні» бойынша ән мен күйдің тарихы да енгізілді. Бұдан бөлек химия, биология, математика, физиканы біріктіріп оқытатын STEM бағдарламасы бойынша кеңейтілген зертханалық жұмыстарға да қатысады. Балалар ел астанасындағы барлық мәдени, тарихи нысандармен танысатын болады. Сондай-ақ оларды «Бурабай» мемлекеттік ұлттық табиғи саябағына, «Ботай-Бурабай» аспан асты мұражайына және «АЛЖИР» мемориалды-мұражай кешеніне апарамыз. Үйірмелер тек қазақ тілінде жүреді. Сондықтан парсы және орыс тілінің аудармашыларын да алдық. Тіпті бес уақыт берілетін тамақтарға да ұлттық тағамдар түрін таңдадық», дейді Назарбаев зияткерлік мектептерін дамыту департаментінің директоры Жұлдыз Сүлейменова.
Бұл жолы әлемнің әр қиырынан Қазақ елінің бас қаласында бастары қосылғандардың көпшілігі атажұрт топырағына табаны тұңғыш тигендер болып шықты. Нұр-Сұлтанға Ираннан еліміздің батыс облыстары арқылы жеткен 15 жастағы Аланияз Шадкам жол бойы тұмса табиғат пен өз ұлтының дарқандығына тәнті болған тебіренісін толқып тұрып жеткізді. Ауылдағы әжесінің атажұртқа сәлемін аманат етіп арқалап келген бала болашағын тарихи отанымен байланыстырғысы келетінін де жасырмады. Ираннан келген 15 жастағы Рәбия Дивал «Мен атажұртқа бірінші рет келіп тұрмын. Қазақ жеріне келгенде өзімді жәннатқа кіріп бара жатқандай күйде сезіндім. Менің ата-бабам осында өмір сүрген. Ал мен Иранға қалай кеттім? Соны білу үшін, өзімді тану үшін келдім. Мен қазақ болып туғаныма қуанамын және қайда жүрсем де қазақ болып қаламын. Өзім алыста, Иранда болғаныммен Қазақстан жүрегімнің төрінен орын алған. Басқа елден келген қатарластарыммен танысқаныма өте қуаныштымын. Мектеп бітірген соң астанаға келіп оқығым келеді», дейді.
Бұл шетелдегі қазақ балаларына арналған осы жаздағы жұмыстың бір парасы ғана. «Ақмола облысы Зеренді кентінде өтіп жатқан «Зерен-2019» республикалық танымдық жастар лагеріне жалпы 30 жас қатысатын болса, «Туған елге саяхат» балалар туристік пойызы жобасы аясында еліміздің 5 қаласын отарбамен аралап өткен 200 баланың 25-і шетелдік қазақ бала. 28 шілде күні Бурабайдағы «Балдәурен» республикалық балалар лагеріне қандастарымыздың 300-ге жуық баласы аттанады», деді «Отандастар қоры» КеАҚ вице-президенті Мағауия Сарбасов.
Бұдан бөлек «Отандастар қоры» КеАҚ шетелдегі қазақ жастары үшін «Jas Qazaq» клубын құрмақ. Бұл құрылымның міндеті – жас буынға қазақтың тілі мен дәстүрін үйрету. Ол қашықтықтан интерактивтік сыныптар ашу, тіл үйретуге арналған мобильды қосымшалар жасау, қазақстандық оқу орындарымен бірлесіп қазақ тілі мұғалімдеріне арналған интернет платформа құру және әдістемелік құрал әзірлеу сияқты жолдармен іске аспақ. Келесі бір іргелі жоба – шетелдегі қазақтар үшін «Qazaq uyi» және «Абай» мәдени орталықтары, «Атамекен» іскерлік үйлерін ашу. Бұл қандастарымыздың қазақ ұлтының қадір-қасиетін ұғынып, салт-дәстүрін бойына сіңіруіне көмектеседі.
Майгүл СҰЛТАН,
«Egemen Qazaqstan»