Көктем, жаз айларында күн райының қайта-қайта құбылғаны диқандарға ауыр тиді. Қазір де егістік алқаптарындағы күзгі жиын-терім қиынға түсуде. Ауыл шаруашылығы вице-министрі Айдарбек Сапаров республика бойынша 12,4 млн гектар алқапта егін орылғанын мәлімдеді. 2018 жылға қарағанда биыл өнім 15 пайыз аз жиналуы мүмкін. Бұл жағдай нанның қымбаттауына ықпал етуі ықтимал, деді ведомство өкілі.
Вице-министрдің дерегіне сенсек, күзгі жиын-терім жұмыстары 81% орындалды. Астықтың жылдағыға қарағанда аз шығуына жаздағы аптап ыстық себеп болды. 2018 жылы жиналған астықтың жалпы көлемі 20,3 млн тонна болса, биыл 17 млн тонна астық жинау жоспарланып отыр.
– Елімізде 1 шілдеден бастап аптап ыстық болды. Әсіресе ең астықты өңірлердің бірі саналатын Қостанай өңіріндегі 8 ауданда егін күйіп кетті. Бұл аймақта қазір гектарына 3,4 центнер астық жиналып жатыр. Сол себепті өнім төмен. Үкімет тарапынан фермерлерге барлық қолдау көрсетілді. Жанар-жағармай 100 пайыз берілді. Техника жеткілікті, барлығы жөндеуден өткен. Шаруашылық басшылары жұмысты барынша жоғары деңгейде жүргізіп жатыр. Ауа райы ашылса, 10-12 күннің ішінде егін жинау науқанын аяқтаймыз, – деді А.Сапаров.
Ведомство басшысының орынбасары бұл жағдай нанның бағасына әсер етуі мүмкін екенін айтты, десе де әлеуметтік нанның бағасы қымбаттамайды деп уәде берді.
– Бұл мәселеде болжам айту әлі ертерек. Нан бағасы сәл қымбаттауы мүмкін. Алайда әлеуметтік нан бағасы қымбаттамайды. Бір бөлке 78-85 теңге аралығында сатылады. Астық бағасы көтерілген жағдайда әлеуметтік кәсіпкерлік корпорациялары шара қабылдайды. Тіпті оған әкімдіктер мен азық-түлік корпорациясының тұрақтандыру қорлары тартылады. Әзірге астық жинау науқаны жүріп жатыр. Бізге әлі егістіктің шамамен 20%-ын жинау қажет. Жағдайды бақылауда ұстап отырмыз, – деді вице-министр. Спикер биыл экспорт көлемінің де азаю қаупі бар екенін айтады.
– Экспортқа қанша мөлшерде бидайдың шығарылатынын да әзірге айту қиындау. Менің ойымша, экспортқа 6-7 млн тонна астық шығарылуға тиіс. 17 млн тонна жинасақ, 2018 жылға қарағанда түсім азырақ болады. Бірақ ішкі сұраныс толығымен қанағаттандырылады, – деді А.Сапаров.
2019 жылы республика бойынша 22,2 млн гектар жерге астық себілді. Оның 15,4 млн гектары дәнді дақылдар болса, соның ішінде 11,4 млн гектары бидай алқабы. Қазір республика бойынша орташа өнімділік гектарына 11,5 центнерді құрайды.