Антқа адалдығынан айнымаған

Ер азаматтардың өздері тә­уе­кел етіп, бара бермейтін қоғам ты­ныштығын сақтау, адам­дар­дың қауіпсіздігін қамта­масыз ету жолында талмай қызмет атқа­рып, қазақ әйел­деріне тән ақы­лына көркі сай аруларды көр­генде риза­шы­лы­ғың­ды жасыра алмайсың. Нар жүгін­дей үлкен сенім артылған жауап­кер­шілік міндеті мен ұр­пақ өсі­ру секілді аналық парызына қылау түсірмей қатар алып жү­ру екінің бірінің қолынан ке­ле бермесі анық. Иығына полковник погонын таққан, жеті жылдан бері облыстық полиция департаментінің штаб бастығы секілді аса жауапты лауазымды мінсіз атқарып келе жатқан Сәуле Андағұлова – тал бойына мейірімділік, қай­рат­керлік, ізденімпаздық, бі­лім­ділік қасиеттерді то­ғыс­тыр­ған ерекше жан. Ол мәуелі шаңы­рақтағы екі ұл, екі қыз­дың тұла­бойы тұңғышы бол­ған­дық­тан ба, жастайынан ата-ананың қол­ға­натына айналып, ерте есейді. Әкесі Тыныштық Дүй­секин саналы ғұмырын ішкі істер саласына арнады. Еңбек жолын қатардағы тәртіп сақ­шы­сынан бастап, отыз жылға жуық ыстық-суығын бірдей көрді. Өмірден көрген-түйгені мол қария «адал болыңдар, біреудің ала жібін аттамаңдар. Маңдай термен тап­қан нанның қадірін біліңдер» деген көшелі мінезінен айныған емес. Әлі күнге дейін балалары мен келіндерін, немерелерін жақсылыққа, имандылыққа үн­деп, жаман дағдылардан сақтан­ды­рып отырады.

Сәуле мектеп бітіргеннен ке­йін әке жолын жалғастыру тура­лы ішке бүккен сыры, түпкі­лік­ті таңдауы туралы ешкімге тіс жармады. Тергеуші болсам деген асқақ арманмен Ресей­дің Том заң институтына құ­жат тапсырды. Алайда, жолы оңға­рылмай елге оралды. Тумы­сы­нан жігерлі, мақсатшыл қыздың одан тауы шағылып, тауаны қайтпады. Бір жылдай аға пионер вожатый болып істеп әрі білімін толықтырып, Петропавл қаласындағы пединститутқа түсті. Қостанай облысы, Нау­рызым аудандық кәмелетке тол­мағандар ісі жөніндегі инспек­ция бөлімінің есігін имене ашқа­ны әлі күнгідей есінде. Онда­ғылар жас маманды кәнігі көз танысындай құшақ жая қар­сы алды. Тәжірибесіздігіне, тіпті басқа мамандық иесі екен­дігіне қарамастан өзіне лайық қызмет ұсынылып, ұр­шық­ша үйіріп әкетті. Одан кейінгі өмір жолы Қызылжар өңірімен тығыз байланысты. Тергеуші, аға тергеуші, бөлім бастығы, басқарма бастығының орынбасары секілді шыңдалу бас­пал­дақтарынан өтті. Мол тә­жірибе жинақтағаны ес­ке­ріліп, 2012 жылы теріскейлік бұ­рым­дылар арасынан ал­ғаш болып облыстық полиция де­пар­та­ментінің штаб бас­ты­ғы­на та­ғай­ындалды.

– Біз отбасында төрт баламыз. Асқар тау әкеме мәңгілік қарыздармын. Бәрімізді тәр­тіп­ке, жауапкершілікке, бастаған істі аяқсыз қалдыр­мау­ға, өтірік айт­пау­ға, шыншыл болуға үйретті. Осындай дәрежеге жетуіме үл­кен ықпал еткен Хайдар Кә­ше­нов, Ерсайын Сарқұлов, Абай Ғалиев секілді аға­ла­ры­ма алғысым шек­сіз. Мазасыз қызметтің ерте кетіп, кеш келе­тін қиындығын жолдасым Серік, болашақ заңгер ұлым Мір­болат та түсініп, қол­дан кел­ген көмектерін аямай­ды. Қарап отырсам, жарты ғұмы­рымды ішкі істер саласына арнаппын. Аз ба, көп пе – оған уақыт төреші, –деген сұхбат­та­сымыздың сөз саптасынан жұ­мыс пен отбасы тізгінін қатар ұстай жүріп Алматы заң ака­демиясын сырттай бітіріп алға­нын білдік. Департаменттің бар­лық ұйымдастыру, ағымдық жұ­мыстарын жоспарлау, бақы­лау, қадағалау штаб арқылы жү­зе­ге асатындықтан, кез келген іске алдымен өзі тікелей атса­лы­сады. Қарамағындағы 31 қыз­мет­керден де жауапкершілік пен жеделділікті бірінші кезекте талап етіп отырады. Бұған оның қоғамдық негізде атқаратын іс-шараларын қоссақ, жұмыс жетіп артылады.

Әйелдер ке­ңе­сінің төрайымы ретінде тұр­­мысы төмен, асырауында мү­ге­дек балалар бар 13 отба­сы­­н өз қамқорлықтарына алған. Ресей Федерациясының Қор­ған, Түмен, Омбы облыстары ішкі істер министрліктері өкіл­дерімен бірлесіп өткізген үй­лестіру тобының отырысын­да «Көрші бақылауы» бағ­дар­ла­ма­сы жайлы сали­қалы баяндама жасап, екі ел полицейлерінің қоян-қолтық араласуына ұйыт­қы болған. Жуырда тікелей эфир­дегі көрсетілім бойынша ке­зекті «қауырт желі» байланысы ұйымдастырылып, штаб бастығы екі сағаттық онлайн-конференция барысында қылмыстық құқық бұзу­шы­лық­тар туралы өтініштерге, қабылдау, тіркеу, кезекші бө­лім­дерге жүгіну, оқиға орындарына жедел топтар мен наряд­тар­дың шығу тәртібі, тағы басқа көптеген мәселелерге нақ­ты жауап берді. Оның әр сөзі­нен полицей мамандығы өте жауап­ты, қоғам тыныштығы жіті бақылауда екені анық аңғары­лып тұрады.

Сәуле Тыныштыққызының інісі Алмат, сіңлісі Гүлмира әке­лерінің, апаларының жолын қуып, әулет атына кір кел­тір­меу­ді басты мұрат санайды.

Солтүстік Қазақстан облысы