Тағдыры қасіретпен аяқталған Алаш арыстарының аяулы мекені болған Алматы көрнекті қайраткерлерді қастерлеудің озық үлгісін көрсетуден аянып қалған емес. Солардың бірі Телжан Шонанұлы соңына 32 кітап жазып қалдырған екен.
Телжан Шонанұлының туғанына биыл 125 жыл толыпты. Ұлттық кітапхана ұжымы Алаш ардақтысының бес томдық шығармалар жинағының тұсауын кеспекші. Бұл шара алдағы жұма күніне ұйымдастырылып отыр. «Жазу реформасы: рухани жаңғыру және тарихи сабақтастық» деп аталады. Себебі, Шонанұлының жазу реформасына тікелей қатысы бар.
Кітапхананың сирек қолжазбалар бөлімі «спецхран» аталып кеткен арнайы қорда сақталып тұрған Шонанұлына қатысты құпия құжаттардың барлығын осы күні алдымызға жайып салмақ. 1938 жылы Шонанұлы атылған кезде оның бүкіл еңбектері, қолжазбалары аяусыз отқа өртелген. Сонда қарапайым кітапханашылар оның біраз еңбектерін жасырып сақтап қалған.
Аталған жиында ХХ ғасырдың басындағы жазу реформасына байланысты ұстанымдарды айқындау, сол кезеңдегі қоғамның ахуалы мен тілдік жағдаятты көрсету, Т.Шонанұлының өмірі мен ғылыми мұрасын кең көлемде насихаттау, қазақ тілін оқыту әдістемесіне қатысты ғалым қолданған, бүгінгі таңда тілді оқытуда пайдалануға болатын әдіс-тәсілдерді көрсетіп, бірқатар ұсыныс жасалмақ. Алаш қайраткерін ардақтау шарасына Білім және ғылым министрлігінің Ғылым комитеті және А.Байтұрсынұлы атындағы Тіл білімі институты қолдау білдіріп отыр.