Президент Қасым-Жомарт Тоқаев биылғы жылды Волонтер жылы деп белгілеген еді. Осыған байланысты қазір жер-жерлерде Қазақстан халқы Ассамблеясы облыстық филиалдарының шеңберінде волонтерлік қозғалыс орталықтары ашылып жатыр.
Өткен аптаның соңғы күні Солтүстік Қазақстан облысының ҚХА шеңберінде осындай орталық ашылды. Онда волонтерлік қозғалыстың мақсаты, әлеуметтік бастамалар мен жобаларды іске асырудағы олардың рөлі туралы айтылды. Сонымен бірге волонтерлік жұмыстардың үйлестірушісі ҚХА болатыны да жеткізілді.
Волонтер дегеннің өзі – жастардың қоғамдық пайдалы істерге көмек көрсетіп, қолғабыс тигізуі. Кеңес Одағы жылдарында ондайды «Тимур қозғалысы» деп атайтын. Жазушы Аркадий Гайдар ойлап тауып, өзінің «Тимур және оның командасы» деген кітабында осы қозғалыстың қалай болу керектігін көрсеткен. Соны басшылыққа алған Кеңес Одағының оқушылары қарт адамдарға, жарымжан жандарға, соғыс мүгедектеріне көмектесуді, олардың отынын жарып, суын әкеліп беруді және т.б. үй шаруаларын атқаруды қолға алған. Олар өздерінің көмектері үшін ешкімнен, ешқандай ақы талап етпейді. Жұмыс істегеннің өзі өзімізге пайдалы, үйренеміз әрі дене қозғалыстарын жасаймыз, ұйымшылдықтың не екенін іс жүзінде көреміз деген ұрандар болатын. Волонтерлік деген дәл осы қозғалыс, бірақ мұның қамту аясы «тимуршылардан» да асып кеткен. Волонтерлер жеке адамдарға көмектесумен шектелмейді, олар жалпы қоғамға, мемлекетке қажетті шаруаларға қолғабыс тигізеді. Соның ішінде көшелерге гүл, ағаш отырғызу, өмірде түрлі қағажу көрген жандарға көмектесу, иесіз қалған жануарлар мен иттерге, мысықтарға қамқорлық жасау, есірткіге қарсы күреске, жасөспірімдер арасындағы қылмысқа қарсы профилактикалық шаралар өткізу, тегін концерттер мен өнер көрсету және т.б. Сонымен қатар халықаралық шаралар өткізілгенде қонақтарды күту, аудармашылық қызметтер атқару сияқты істерді атқаруға да қазір волонтерлер қызу араласады.
Солтүстік Қазақстан облысы