Eл Президенті Қасым-Жомарт Тоқаевтың «Абай және XXI ғасырдағы Қазақстан» атты мақаласы жарық көрді. Бұл еңбек – ұлы ойшыл Абайдың мол мұрасын бүкіл жұртқа паш етудің, кемеңгердің 175 жылдығын жоғары деңгейде атап өтудің кілті деп білемін.
Президент бізге жол сілтей отыра, Абай шығармаларының құндылықтарын мынау дамыған заманмен салыстырады. Өркениетті елдердің алдында қазақ білімді, білікті болуын, ғылымның дамуына үлес қосуы қажеттігін айтады. Бұған барлық ел болып жұмыла кірісуіміз қажет. Әсіресе күні-түні көзін телефоннан алмайтын болашақ ұрпақты Абай жолымен тәрбиелеуіміз керек. Бойларына асыл мұраны сіңіру шарт. Өйткені «Жұмыла көтерген жүк қашанда жеңіл».
Жастардың бойында патриоттық сезімді ояту, олардың тарихқа деген ізгі ұмтылыстарын арттыру үшін филармония Абайдың музыка әлеміне қосқан өлшеусіз үлесін дәріптеп келеді. Бүгінде композитордың әуезді әндері Мемлекеттік академиялық филармонияның репертуарынан ойып тұрып орын алған.
Сондай-ақ Абайдың 175 жылдық мерейтойы аясында өнер ордасының ұжымы, яғни 700 қызметкер «Көзімнің қарасы» шығармасын орындау бойынша челлендж ұйымдастырды. Бұл ауқымды эстафета еліміздің барлық аймағында жалғасын тапты.
Кемел ойдың кемеңгері Абай Құнанбайұлының есімі ешқашан өлмек емес. Оны бүгінгі ұрпақ ұлықтай береді.
Ерлан ДАКЕНОВ,
Нұр-Сұлтан қалалық әкімдігі Мемлекеттік академиялық филармониясының бас директоры