Баланы құтқарған капитан

Қасындағы әріптесімен бірге көлік дабылын қоса оқи­­ға болған аймаққа қарай жүйткіген олар небәрі 3 минут­та каналға жетті. Жағаға бірне­ше адам жиналып қалған, әлде­бір балалар үрейлі дауыспен ай­қайлап жүр. Ал судың орта тұ­сында тұншығып, батып бара жатқан баланың сұлбасы ғана көрінеді. Қар еріп, каналдағы су арнасына толған кез. Суық суға түсіп баланы құтқарып қа­луға ешкімнің батылы жетпей немесе жүзе алмайтындар жи­налса керек, әйтпесе үлкені де, кішісі жағада тұр. Өкінішке қа­рай, қызық көргендей ұялы телефонын алып бейнетаспаға тү­сіріп жатқаны да бар. Канал жа­ғасына жеткен бойда сырт киімін тез-тез шешкен Жетісай АПБ-ның анықтаушысы, полиция капитаны Марат Нұрым­бетов тастай суға қойып кетті. Одан соң су шетінде жатқан жұм­сақ ре­зеңке шлангты қо­лына мықтап қыса, балаға қа­рай бар күшімен жүзе жөнелді. Ағысы қатты су да әжептеуір те­рең еді. Екеуін де су түбіне тар­тып кету қаупі үлкен. Осы сәтте Маратта ең болмаса бала­ны қо­лындағы шлангке орап, құт­қарып қалайын деген ой болды.

Жасөспірім бала суға бір батып, бір шығып, жанұшыра айқайлауда. Бар күшімен жүзіп, санаулы секундтың ішін­де Марат та жетті. Балада дәр­­мен қалмаған. Су жұтып қойыпты. Құтқарушының қо­лы жеткені сол, сылқ түсті. Су­ға батып бара жатқан ұлдың денесін жұл­қи тартқан поли­ция капи­таны бір қолымен қап­сыра құшақтаған күйі жоғары қарай құ­­лаш сермеді. Осылайша баланы қармаған күйі жағаға қарай жүзе бастады. Қырсыққанда жағаға бес метрдей қалғанда, аяғын қа­йы­рып алса бола ма. Бала болса, қолында. Бар күшін жи­нап, қайта жүзе бастады. Жа­ғаға аман жеткен оларды Мараттың әріптестері кү­­тіп алды. Баланың денесі былқ-сылқ етіп, жансызданып бара жатты. Уақыт қымбат, жағаға шығысымен жедел жәр­демді күтпеген полицейлер қызметтік көлікке бала­ны сала ауруханаға қарай жыл­дамдатты. Жолда кетіп бара жатып балаға ал­ғашқы меди­циналық көмек көрсетуге кі­ріскен Марат Нұ­рымбетов жасөспірімнің жұ­тып қойған суын шығарумен әлектенді. Ес-түссіз жатқан оны жасан­ды жолмен демалдырып, сілкілеп, жүрегіне массаж жасады. Оған қоса суықта тоңып қалған мұздай денесін жылытайын деп уқалап, бар білген медициналық көмектерін көр­сетті. Әріптесі көлікті бірне­ше ми­нут ішінде емханаға жет­кізді. Баланы ақ халатты жан­дар­дың қолына табыстаған соң ғана полицейлердің көңілі ор­нына түскендей болды.

Он екі жастағы жеткіншек бірден жансақтау бөліміне жат­қызылып, кейіннен палатаға ауыс­тырылды. Әрине, аман қалған баланың ата-анасы құт­қарушы полицейге ағынан жарылып алғыстарын айтуда. Тосын оқиғаны әріптесі, Түр­кістан облысы Полиция де­партаментінің қызметкері Гүлнар Әбдірахманқызына толық баяндап берген полиция капитаны Марат Нұрым­бетов: «Бұл мен үшін ерлік емес, баланы құрмет көрейін, танымал болайын деп те құт­қарғаным жоқ. Менің орным­дағы кез келген адам осылай істейді. Бар ойым баланы аман алып қалу болды», – дейді.

Бұл ісін ерлік санамайтын, адами міндеті деп есептейтін по­лицей Жетісай ауданында дү­ниеге келген. Қатер төн­ген шақта батылдық танытып, бір­ден шешім қабылдап, жас баланы құтқарып қалған по­ли­цеймен арқа сүйер елі де мақ­танады. Өз өміріне қауіп төнсе де ойланбас­тан өзгенің өмі­рі үшін тәуекелге бас тіккен по­лицейді әріптестері де құрмет тұтады.

Түркістан облысы