Аграршылардың болжамынша, Ақмола алқаптарының берекесі биыл да молынан болмақ. Ендігі міндет маңдай термен жиналатын астықтың қозғалысын қадағалап, оны тұтынушыға тоқтаусыз жеткізу екендігі белгілі. Бұл орайда теміржолшылар атқарар шаруа өте жауапты. Өйткені, ТМД елдерінде, Еуроодақта, Таяу Шығыс пен Орталық Азияда Ақмола астығына сұраныс жоғары.
Аграршылардың болжамынша, Ақмола алқаптарының берекесі биыл да молынан болмақ. Ендігі міндет маңдай термен жиналатын астықтың қозғалысын қадағалап, оны тұтынушыға тоқтаусыз жеткізу екендігі белгілі. Бұл орайда теміржолшылар атқарар шаруа өте жауапты. Өйткені, ТМД елдерінде, Еуроодақта, Таяу Шығыс пен Орталық Азияда Ақмола астығына сұраныс жоғары.
«Қазақстан темір жолы» АҚ-тың Ақмола бөлімшесінен алынған деректер бойынша, облыс аумағында 30 астық тиеу-түсіру стансасы, оның ішінде тұйық жолмен байланысатын 23 элеватор мен 20 астық қабылдау кәсіпорны бар. Бұлардың қатарында Ақкөл, Макинка, Бурабай курорты, Қырықыншы, Азат, Жақсы, Атбасар, Жалтыр, Еркіншілік стансалары анағұрлым ірілер қатарына жатады. Сондай-ақ, «АПК-Инвест», «Грейн Трейд», «Қазақстандық Астық компаниясы», «ҚазЭкспортАстық», «Виталмар», «АгроСтарГрейн», «Азия АгроФуд» жауапкершілігі шектеулі серіктестіктері тұрақты астық жөнелтушілер санатында болса, «ТНК Агрофирмасы», «Колутон», «Интер Трайд», «Бава», «Гресса», «Лимар Агро» серіктестіктері сыртқа ұн шығаруда табысты жұмыс істеуде.
Таяуда облыс әкімінің бірінші орынбасары Рашит Әкімов өткізген мәжілісте аталған кәсіпорындардың барлығы астық қабылдауға 100 пайыз дайын екендігі айтылды. Әйткенмен, қолда бар астықтың қозғалысы тоқтаусыз жүргізілуі керек. Өйткені, қоймалардың жалпы сыйымдылығы 3,5 миллион тонна, ал күз ырыздығы 5 миллион тоннадан асады деп күтілуде.
Бұл орайда, ақмолалық теміржолшыларға ырзалық білдіруге болатындай. Биылғы 7 айдың өзінде 19639 вагон тиеліп, 1320513 тонна астық тасымалданыпты. Оның ішінде ішкі рынокқа 490196 тонна, экспортқа 830317 тонна бағалы өнім жөнелтілген. Осы орайда, Ақтау порты арқылы Иранға 63441 тонна астық жеткізілгенін бөлектеп айтуға болады. Мұндағы негізгі үлес «ҚазТемірТранс» АҚ-тың вагон паркіне тиесілі.
Теміржолшылар биылғы астық тасымалына 7476 вагонды тұрақты түрде сапарға шығарып отырмақ. Мұның 1361-і 2012-2013 жылдары сатып алынған вагондар. Бұған қосымша, «Қазақстан темір жолы» АҚ Ресейдің «Русагротранс» ЖАҚ, «Технотранс» ААҚ, Орта Азия мемлекеттерінің, Әзербайжан мен Грузияның вагондарын пайдалану жөнінде келіссөз жүргізді. Сондай-ақ, ел аумағында жаңа темір жол тармақтарының іске қосылуы және тарифтердің анағұрлым төмендегені ортақ іске серпін беретіні анық.
Бақберген АМАЛБЕК,
«Егемен Қазақстан».
Ақмола облысы.