Бұл Ұлы дала төсінде төрткүл дүниеге сауын айтып, Алты сан Алаштан алақайлап сүйінші сұрайтын, ұлтымыздың дара келбеті, ұлы ойшылы, хакім Абай рухын асқақтата көрсететін қайырлы күн!
Бүгін қазақ жырының адамзат көгіне қанат жайған мәртебелі мезеті!
Қазақ руханиятының құбыласына айналған Абай құбылысына ерекше зер салу әрқайсымыздың бұлжымас борышымыз болса керек.
Абай – біздің өнегелі өміріміздегі басты бағыт. Өркениет өріне қаймықпай қадам басар кез келген ұлт өзінің адастырмас жолын көрнекті тұлғалары арқылы таңдайды. Бұл тұрғыда біздің жолымыз – Абайдың жолы екенін жақсы сезінгеніміз дұрыс.
Абай – қазақ көгіне мәңгі нұрын шашып тұрар жарық жұлдыз! Абай – түгел адамзатты жүрегінің түбіндегі асыл ақиқатқа жетелеп бара жатқан дара даңғыл, биік мұраттарына бастап бара жатқан жаяу бұйдагер!
Ұлы сахарадағы жалғыз жанартаудай мұнартып тұрған ақын болмысы бізді үнемі өзіне шақырып келеді. Кәрі уақытпен астасып, заманалар алыстаған сайын тұлғасы зорайып, мұрасы айқындала түскен шерлі шайыр бізді үнемі білдіртпей бағып тұрғандай!
Абай – әлем кітапханаларының көне сөрелерін қос қара томымен, классик Мұхтар Әуезовтің «Абай жолы» роман-эпопеясымен қайыстырып тұрған қайталанбас тұлға!
Абай – әлемнің түкпір-түкпіріне еңселі ескерткіш болып лайықты орныққан ойшыл!
Тобықты төңірегіне ғана емес, түгел адамзат жүрегінің түбіне шам орнатып, ізгілік пен иман сәулесін жарқырата төгіп тұрған қызыл шамшырақ – ол Абай феномені!
Абай – өткеніміз бен келешегіміздің, жіберген қателігіміз бен жеткен жетістігіміздің, барар бағытымыз мен алар орнымыздың айқын жолбасшысы!
Біз бүгін осыдан тура 175 жыл бұрын қарт Шыңғыстаудың етегінде, Ералының бай жазығында шыр еткен сәби үнінің адамзат дауысына айналған күнін мерекелеп жатырмыз!
Данышпан ақын батыс пен шығысты, бүгін мен ертеңді, өмір мен өлеңді жалғап жатқан алтын көпір ретінде адамзатқа ортақ!
Абай – шындықтың шырағы, ақиқаттың алауы!
Бүгін біз хакімнің алты қанат ақ ордасында туған асыл ойлары дүниежүзінің алтын босағалы ақ сарайларының ішін еркін аралап, қуатты дауыс зорайтқыштар арқылы адамзат жадына ұмытылмастай көшкеніне, мәңгі өлмес мәтіндер болып мәрмәр тастарға қашалғанына куә болудамыз!
Абай жолы – Алаш жолы!
Ұлтты адастырмас ескі сүрлеу шексіз кеңістікпен астасып кеткелі қашан! Сол жолда өзімізді жоғалтпауымыз ғана маңызды!
Біз үнемі Алаш мұратын алға бастар Абай мұрасын терең түйсінуіміз керек!
Абайдың өзін ғана танып қоймай, оның өмір сүрген рухани ортасын, қоғам райын, ұлт дидарын қоса зерделеуіміз де уақыт талабы!
Абайдың айналасы арқылы ғана қазақтың мінезі толық ашылады. Абай-Құнанбай қарым-қатынасы арқылы ұлттың биік парасаты түгенделеді!
Абай-Әйгерім сүйіспеншілігі арқылы асыл сезімдер бүр жарады!
Абай-Әбіш мейірімі арқылы ұрпақ сабақтастығы түсіндіріледі!
Бұлардың барлығы Абай жолына шығар бірінші баспалдақ, әуелгі бекеттер ғана дер едік!
Абай – бір сөзбен айтқанда ынтымақ пен бірліктің, ізгілік пен кемелдіктің, биік парасат пен терең поэзияның символы! Әр сөзі қадау-қадау тірек, тұтастықтың Туы, мейірімнің мөрі! «Толық адам» тұжырымы – кісіліктің кілті!
Абай – қазақтың рухани құбыласы.
Абай – дәуір дауысы, Абай – уақыт тынысы!
Абай – адамдықтың ақылгөй асыл ұстазы!
Абай тағылымына тағзым ету – Рухани жаңғыруымыздың ұлы кезеңі!