ҚМДБ-ның Нұр-Сұлтан қаласы өкілдігі мен "Зекет" қорының ұйымдастыруымен "Өмірге үміт сыйла" акциясы бойынша елордадағы ауруханаларға 20 оттегі концентраторы мен 20 өкпені тыныстандыру аппараты тапсырылды. Бұл туралы ҚМДБ баспасөз қызметі хабарлайды, деп жазады Egemen.kz
ҚМДБ "Зекет" қоры елімізде тынысы тарылып, дем жетпей жатқан науқастарды қолдау мақсатымен "Өмірге үміт сыйла" акциясын жариялаған болатын. Бұл шара еліміздің түкпір-түкпірінде қолдау тауып, мешіттер мен "Зекет" қорының филиалдарында белсенді түрде жүзеге асып жатыр. Нұр-Сұлтан қаласы мешіттері де ізгі шарадан қалыс қалмады.
Қайырымдылықты жаны сүйетін азаматтардың басын біріктірген "SAUAP" белсенділер тобының мүшелері де атсалысқан игі шараға "Нұр-Сұлтан қаласының Дін істері жөніндегі басқармасы" мемлекеттік мекемесінің басшысы Нұрдаулет Иманалиұлы мен "Зекет" қоры директорының орынбасары Ділмұхан Нұркен және Нұр-Сұлтан қаласының бас имамы Ерболат Жүсіпов қатысты.
Асыл дініміз бен қазақ тағылымында дер кезінде қол ұшын созып, көмек көрсету үлкен сауапты амалдардың қатарына жатады. Осы бағытта талмай еңбектеніп жүрген "SAUAP" еріктілер тобының азаматтарына Нұр-Сұлтан қаласының бас имамы Ерболат Жүсіпов сіңірген еңбектерін Алла сауаптан жазсын деп дұға етіп, айрықша алғысын білдірді.