Өткен сенбіде Ақпарат және қоғамдық даму министрлігінің тапсырмасымен Дүниежүзі қазақтар қауымдастығы, «Отандастар қоры» КеАҚ және «Қазақконцерт» ұйымы бірлесіп, «TURAN» этно-фольклорлық ансамблінің қатысуымен шеттегі қазақтарға арнап «Ұлы дала елінен» атты онлайн концерт өткізді.
Шараны ұйымдастырушылардың пікірінше, аталмыш концерттің мақсаты – музыкалық өнер арқылы ұлттық бірегейлікті сақтап, сыртта жүрген қазақ диаспорасына рухани қолдау көрсету және шет елдегі қандастармен байланысты нығайту екен.
«TURAN» этно-фольклорлық ансамблі – еліміздің ұлттық музыкалық мұрасын жаңғыртып, ұмыт бола бастаған төл аспаптар сүйемелдеуімен көне күй-жырларды насихаттап жүрген бірегей топ. Өнер ұжымы бұған дейін қазақ музыкасын әлемге әйгілеп, 70-тен астам шет мемлекетте 600-ден астам жеке концерт берген екен.
Соның ішінде әлем әйгілі «Карнеги холл», «Кеннеди орталығы», «Концерт хаус», «Кремль сарайы», «Салле Корто» залдарында өнер көрсеткенін айтуымыз керек. Сондай-ақ өнерпаздардың қолында халқымыздың 30-дан астам ұлттық музыкалық аспабы бар. Музыканттардың әрқайсысы солардың бірнешеуінде ойнауды меңгерген.
Онлайн концерт барысында ансамбль мүшелері талантты музыканттар: Серік Нұрмолдаев, Мақсат Медеубек, Бауыржан Бекмұханбетов, Ержігіт Әлиев, Жанту Дадабаевтар ұлттық аспаптардың дыбысын қазіргі заманға сай лайықтап, жаңа форматта ұсынумен бірге, қазақ халқының ұлттық музыкалық мұрасын жаңғыртып, ұмыт бола бастаған төл аспаптардың сүйемелдеуімен өздерінің үздік туындыларын орындады.
Олар орындаған «Ортеке», «Ақсақ құлан», «Керуен», «Көроғлы», «Аққу», «Бүркіт» күйлері сахна төрінде тұрған үлкен экран арқылы тамаша көріністермен әдіптеліп, әрленіп, жаңа пішінмен түрленіп көрсетілді.
Сонымен бірге, ұжым төл туындылары «Қыран далам – Тұран далам», «Қилы заман» шығармаларын орындады. Бұл дүниелерге эпос, жыр, монолог, күй, би қатарлы фольклорлық мұралар сіңіріліп, халқымыздың ежелгі этносалты аңшылық, саятшылық көрініс тапса, сазгер Ақтоты Райымқұлованың «Шабыт» және «Абай толғауы» атты шығармалары көрерменнің көңіл пернесін дөп басқандай әсер қалдырды. Концертте бұлардан бөлек Нұр-Сұлтан қаласы Astana Ballet театры және Қазақ ұлттық хореография академиясының әртістері де өнер көрсетті.
Бұл реткі онлайн концертті шет мемлекеттерде жүрген қандастарымыз жоғары көңіл күймен тамашалап, өнерпаздарға көкейдегі сұрақтарын қойды. Қысқасы, аталмыш концерт сұрақ-жауап форматында өтті.