Интернационалмен қоштасатын кез келді

Шынында да біз бүгінгі ұрпақты патриоттық рухта тәрбиелеуде өзінің халқына өлшеусіз еңбек сіңірген ерлерді ұлықтай алып отырмыз ба? Егер қала көшелері солардың атымен аталса – жеткіншектер өз халқының мүддесін қор­ғаған ерлерді де тереңірек біліп өскен болар еді. Оның үстіне ұлыларымыздың қандай қызмет атқарғанынан хабардар ететін жасөспірімдерге арналған шаралар өткізіліп тұрса жақсы емес пе. Тіпті қала көшелеріне ұлыларымыздың аттары берілсе, олардың кім екенін білуге, өздігінен зерт­теуге ұмтылатыны сөз­сіз. Мәселен, біз Ахмет Байтұр­сын­ұлы «ұлт ұстазы» деп атаймыз. Ал оның қандай ұстаз болғанын жастар түгіл кейбір үлкендердің өздері біле бермейді. Араб қарпінің негізінде қазақтың алғашқы төл әліпбиін жасап, қазақ тілі білімін де алғаш айналысқа енгізгендіктен оны ұлт ұстазы дейміз. Бастауыш, баяндауыш, толықтауыш, пысықтауыш деген сияқты тамаша термин­дерді де тіл біліміне сол кісі енгізді. Осындай адамдары­мыз еліміздің барлық бұрыш­тарында тереңнен насихатталып, жастарға таныстырылып отыру керек қой. Сонда патриоттық сезім тереңдеп, жеткіншектеріміздің бойында ұлттық рух ояна түспес пе?

Қазір бізде Әлихан Бө­кей­ханның, Міржақып Ду­латов­тың және басқа Алаш ар­дақтыларын «біздің жер­лес­теріміз емес» деп сыртқа тебетін кері түсінік қалып­тасқан. Қазақ­станның қазір­гі территория­сын айқын­дап, Лениннің алдында қазақ жері­нің көлемін дәлелдеп, картасын сызып берген Әлімхан Ермеков сияқты ерлеріміздің ерлігінен мүлде бейхабар ұрпақ өсіп келеді. Сондықтан мақа­лада айтылған Алаш ардақ­тыларын ардақтап, олардың атына көше аттарын беру туралы пікірді толық қолдаймын. 

Әрине, бір кезде біз комму­нистік партияның мұраттарын бойымызға сіңірдік. Сол үшін пролетарлардың халықаралық гимні Интернационалды да жаттадық. Барлық әлемде социализм жеңетініне сендік. Бірақ коммунистік партия­ның идеясы сөз жүзінде дұрыс болғанымен іс жүзінде оның өмірде толық іске аспайтынын көзімізбен көрдік. Социализмнің де барлық әлемде күшпен орнауы – зор­лық екенін, сондықтан оның күресіне шақырған Интер­националдың да дұрыс емес екенін таныдық. Біз қазір демократиялық мұратты қолдайтын ел орнатуды алды­мызға мақсат етіп отырмыз.

Демократиялық жолмен даму – барлық зорлыққа, қарулы көтеріліске қарсы. Қоғам­дағы саяси және әлеу­меттік-экономикалық саясатты сайлауда көпшілік дауыс алған партия айқындайды. Қазіргі билік партиясы Nur Otan ха­лықтық демократиялық партиясы. Ол коммунистік интернационалды мойындамайды, мақсаты елді демократиялық жолмен дамыту. Ендеше Ин­тер­национал деген секілді ұғым­­дарды бүгінгі жастың сана­­сынан ығыстыра беруіміз керек. Оларды ардақтап, қала­мыздағы ең көрнекті көшесінің атын беріп қоюдың өзі – біздің мақсатымыздың өзін дүбәра халге ұшыратады емес пе? Сондықтан ондай атауларды батыл өзгертуге тиіспіз.

Ескендір ЕЛЕУСІЗОВ,

Солтүстік Қазақстан облыстық Ардагерлер кеңесінің төрағасы

ПЕТРОПАВЛ