Мұстафа Өзтүрікке арналған күй

Елге белгілі спорт қайраткері, даңқты спортшы, халықаралық деңгейдегі жаттықтырушы, аты аңызға айналған тұлға Мұстафа Өзтүрік Қазақстанда таэквондо мектебінің негізін қалаушы ғана емес, аталған спорт сала­сында адал ізбасарларын тәр­биелеген Алаштың аймаңдай аза­мат­тарының бірі. Рухы мықты, өз идеяларына шын берілген Мұс­тафа Өзтүріктің бейнесі ком­по­зитор Шолпан Қорғанбекті «Тар­­лан» аспаптық туындысын шығаруға шабыттандырды. Айтулы шығармада Мұстафа Өз­­түріктің бейнесі кең ауқымда әрі әсем көркемделген. Домбыра үніндегі лирикалық бастама ке­йіп­кердің туған жері туралы, өзінің барлық білімі мен дағ­дыларын туған халқына қалай жеткізуге болатындығы жө­нін­дегі ойларын жеткізеді. Бүкіл ан­самбльмен орындалатын шығар­маның тасқынды бөлігі Мұста­фа Өзтүріктің ерік-жігер, рух күші, ба­тылдық, адалдық сияқты қасиет­­терін аша отырып, жігерлі, ек­пінді шырқалады.

– Қазақстанның аты аңызға айналған ерекше тұлғалары ме­ні әрдайым жігерлендіреді, ша­быт­тандырады. Олар біздің қуатты және бай шежіремізді құ­райтын тұлғалар деп айтуға болады. Сон­дықтан болса керек, ме­нің шығармашылығымның не­гізгі бөлігін тұлғаларға арнаған порт­реттік туындылар құрайды. Атап айтсам, Әл-Фараби, Абай, Сұлтан Бейбарыс, Шыңғысхан, Кейкі ба­тыр, Бауыржан Момышұлы, Бек­зат Саттарханов сияқты бір­туарлар бейнесін музыка тілінде сөйлету маған қай кезде де қы­зық. Мұстафа Өзтүріктің тұл­ғасы да мені музыкалық арнау жа­зуға шабыттандырды. Мықты адам­ның өмірлік бейнесі мен қыз­метіне деген қызығушылықты, жалпы тұлғаның қайраткерік һәм ұлтжандылық қырын музы­ка тілінде дүйім жұртқа жет­кіз­гім, дәріптегім келді. Бұл мақ­та­ныш пен таңдану сезімі! Тың­дау­шы авторлық туындымды ри­за­шы­лықпен қабылдайды деген се­нім­демін», – дейді шығарма авторы, композитор Шолпан Қорғанбек.

Айтулы күй Қазақстанның Гин­несс рекордтар кітабына енген «Қорқыт» этно-ансамблінің орындауында тыңдарманымен қауышты.