Қамқорлық пен мүмкіндік

Жоба аясында облыстық бюджет, демеушілер және қайы­рым­­дылық қорлары арқылы кедей отбасының әрбір мүшесіне медициналық, жұмысқа орналасу, азық-түлік пен тұрмыстық заттар әперу және өзге де мәсе­лелер бойынша тұрақты көмек көр­сетіп, олардың еңсе тіктеуіне жағдай жасау көзделген. Мы­салы, Түлкібас ауданында жер­гілікті әкімдіктің ұйытқы болуы­мен 21 отбасы баспанаға қол жеткізіп отыр.

Соның ішінде 6 отбасыға демеушілір есебінен тұрғын үй берілсе, 15 отбасы мемлекеттік бағдарламамен баспаналы болды. Сондай-ақ 9 отбасының тұрғын үйі демеушілер есебінен жөндеуден өтті. Биыл 9 қарашаға дейін «Қамқорлық» жобасына қатысушы 93 отбасыға 215 млн теңгеден аса қаржыға түр­­лі көмектер көрсетілген. Атап айтқанда, «Феррум Конс­тракшн» ЖШС, «Грамад» гипер­мар­кеті, «Мадина» макарон фаб­ри­касының демеушілігімен әзірленген азық-түлік себеттері «Мейірім» еріктілер тобымен үлестірілді. Бұған қоса бе­кітілген мамандар тарапынан азық-түлік себеттері, киім-ке­шек, материалдық ақшалай көмек және көмір, отын үйме-үй таратылып берілді.

Қайырымды іс жасауды аза­мат­тық парызы санаған Жеті­сай ауданының тұрғындары ал­ты бірдей отбасыға баспана сыйлады. ҚМДБ-ның 30 жыл­дық мерейтойына орай, «Зекет» қорының «Ел үлесі – пә­терге» жобасы аясында баспана тауқыметін тартып жүрген 6 отбасыға барлық жағдайы жа­сал­ған жаңа үйлердің кілті табыс етілді. Баспаналардың жалпы құны 90 млн теңгені құраған.

«Халық арасында «жұмыла көтерген жүк жеңіл» деген керемет сөз бар. Осы орайда әр­қа­шанда халықтың мұң-мұқ­тажын тыңдап, көмек беріп келген елдің анасы атанған Жамал апамызға және оның ісін жалғастырып жүрген ұлы, белгілі кәсіпкер Бахараддин Аблазимовке елдің атынан алғысымды айтамын. Ауданда қайырымдылық арқылы баспана сыйлаудың жарқын үлгісін Жамал апамыз көрсетіп, көпке үлгі бола білді. Бұл ретте жергілікті тұрғындардың ерекше белсенділігін айта кеткеніміз абзал. Әрбір баспананы салу барысында еріктілер тобының және жомарт жандардың еңбегі ерекше. Олар іргетастың қаланған сәтінен тұрғын үй салынып біткенше істің басы-қасында жүрді. Қайырымдылық жасау арқылы ауданның әрбір азаматы өзінің қолында бар дү­ниесімен бөлісіп, мұқтаж азамат­тардың баспаналы болуына өз үлестерін қосуда. Алдағы уа­қытта да осындай баспана салу үшін жер телімдерін тегін бере отырып, мұқтаж жандарға қажетті жағдайды жасаймыз», деді аудан әкімі Жамантай Бейсенбаев үйлерді пайдалануға беру рәсімінде.

Өз кезегінде баспана тауқы­метін 16 жылдан бері тартып келе жатқан жалғызбасты көп­балалы ана Жәудір Төреханова жаңа қоныстанушылар атынан қайырымды жандарға алғыс айтты.

Баспанамен қамтамасыз ету мұқтаж отбасылардың алаң­сыз еңбек етіп, тұрмысын тү­зеуге ықпалын тигізері анық. Сондай-ақ тұрғындардың табысын молайтуға мемлекеттік қолдаулар арқылы ерекше мүмкіндік жасалуда. Бір ға­на мысал, Арыс қаласының тұр­ғыны, 5 баланың анасы Ме­реке Самарханқызы мем­ле­кет­тік қолдау арқылы өз кәсі­бін ашқан. Ол биыл «Бизнес-Бастау» жобасымен кәсіпкерлік негіздерін оқып, «Еңбек» бағ­дар­ламасымен 555 600 теңге көлемінде қайтарымсыз грант алған. Бүгінде ол – табысты кәсіпкер. Аймақта тапсырысқа тәттілер, мерекелік торттар да­йындайды. Іскер ана болашақта ауқымды цех ашуды жоспарлап отыр.

Жалпы, Арыс қаласы бойынша шағын және орта кәсіпкерлік субъектілері саны биыл 4 мың­ға жуықтаған. Оның 2 250-і – жеке кәсіпкер, 994-і – шаруа қожалықтар, 619-ы – заңды тұл­ғалар. Шағын және орта кәсіп­керлік субъектілерімен өнді­рілген өнім және ұсынылған қыз­меттер көлемі 21 млрд 632,1 млн теңгеге жетіп, өткен жылдың тиісті кезеңімен салыстырғанда едәуір артқан.

Шардарада өз тігін цехын аш­қан Құрбанкүл Ерманова да қайтарымсыз грантқа ие болып, құны 555 600 теңгелік сертификат алған. «Қолымнан тігін тігу ісі келген соң осы салада өз бизнес жоспарымды сәтті қор­ғап, қайтарымсыз грантқа ие бол­дым. Шағын кәсіппен айналысам деп жүрген азаматтарға бе­ріліп жатқан мұндай қолдауға шексіз алғысымды білдіремін», дейді жас кәсіпкер.

Жалпы, Шардара ауданында «Еңбек» бағдарламасы аясында 130 азамат қайтарымсыз грантқа ие болған.

Түркістан облысы