Мемлекет басшысы Қасым-Жомарт Тоқаев Волонтер жылының қорытындысына арналған жиында "Қайырымды істер" марафонын ұйымдастыруды ұсынды, деп хабарлайды Egemen.kz.
"Енді санаулы күннен соң біз Тәуелсіздіктің 30 жылдығына қадам басамыз. Бұл – ел дамуындағы аса маңызды белес, тарихи меже. Сондай-ақ жетістігімізді саралап, болашағымызды бағамдайтын кезең. Келер жылғы мерейтойлық іс-шаралардың мазмұнына ерекше мән береміз. Оның әрқайсысы терең мағыналы және қоғам үшін пайдалы болуға тиіс. Сонымен қатар, өскелең ұрпаққа тәлім-тәрбие беруі шарт. Осыған орай, жалпыұлттық деңгейде "Қайырымды істер" марафонын ұйымдастыруды ұсынамын", деді Президент.
Мемлекет басшысы атап өткендей, бұл – береке-бірлігімізді арттыратын маңызды бастама. Қазіргідей күрделі кезеңде жақсы істер жасауға мән бергеніміз елдігімізді нығайта түсетіні анық.