Елордада «Ақындар ауылды жырлайды» атты әдеби-поэтикалық кеш өтті. Іс-шараға «Ауыл» Халықтық-демократиялық патриоттық партиясының төрағасы Әли Бектаев, Парламент Мәжілісінің депутаттығына кандидаттар Дәулеткерей Кәпұлы мен Зейін Әліпбек қатысты.
Сонымен қатар рухани кешке партияның 2017 жылдан бері жыл сайын өткізіп келе жатқан «Ауылым – алтын тұғырым» онлайн-байқауының жеңімпаздары мен қатысушылары жиналды. «Ауыл тақырыбы – ешқашан таусылмайтын, еш шекарасы жоқ, ештеңемен шектелмейтін күрделі тақырып екеніне көзіміз жете түсті. Ауылдың қасиеті мен киесін көрсетудің жақсы бір жолы – әдеби конкурстар арқылы дәріптеу екені белгілі. Ауыл тақырыбын сөз еткен ең мықты шығармаларға онлайн-байқау жарияладық. Поэзия, проза, драма жанрлары бойынша өткен байқауға елге танымал ақын-жазушылар қазылық етті. Бұл игі бастама дәстүрге айналып, жыл сайын өткізіліп келеді. Сол арқылы ел арасынан қаншама мықты жас таланттар жарыққа шықты», деді партия төрағасы Ә.Бектаев.
Ақын, әдебиеттанушы Д.Кәпұлының айтуынша, ұлттық негіз, ұлттық болмыс хақындағы толғамның көрінісін ақын-жазушылардың шығармасынан көруге болады. Қазақтың сөз өнері ықылым замандардан қалыптасып, рухани негізімізге айналып, ұлт ретіндегі таным-түсініктен, болмыс-бітімнен, тұтастықтан еш уақытта ажырамай келеді. Жыраулардың толғаулары, жыршылардың төкпесі, тіпті күйшілердің саусағынан төгілген күмбірлі күйдің өзінде ұлттық нәр, ұлттық бояу, ұлттық сарын мен ұлттық құндылық ажырамай, біртұтас, үндесіп тұрады.
Кеш барысында ақындар өлең оқып, күйшілер күй орындап, әншілер домбырада әнмен шашу шашты. Сондай-ақ жас ақын-жазушылар партия қатарын толықтырып, мүшелікке өтті.