ПАРЛАМЕНТ «Егемен Қазақстанның» арнаулы беті

Қазақстан Республикасы Парламенті Сенатының депутаттары Бірғаным Әйтімова мен Бақтыбай Шелпеков Қазақстан Республикасы – Еуропа Одағы Парламенттік ынтымақтастық комитетінің Брюссель қаласында өткен 12-ші отырысына қатысты, деп хабарлады Сенаттың баспасөз қызметі.

ЕУРОПА – ҚАЗАҚСТАННЫҢ НЕГІЗГІ СЕРІКТЕСІ

Қазақстан Республикасы Парламенті Сенатының депутаттары Бірғаным Әйтімова мен Бақтыбай Шелпеков Қазақстан Республикасы – Еуропа Одағы Парламенттік ынтымақтастық комитетінің Брюссель қаласында өткен 12-ші отырысына қатысты, деп хабарлады Сенаттың баспасөз қызметі.

Отырыс аясында қатысушы­лар Ауғанстаннан НАТО әс­кері шығарылғаннан кейінгі әріптестік, ынты­мақтастық және қауіпсіздік туралы екіжақты келісім, сауда-экономикалық қатынастар, экология, білім беру және ғылыми-техникалық өзара іс-қимыл мәселелерін талқылады.

Депутат Б.Әйтімова Қазақ­стан­дағы білім берудің даму бары­сы, Еуропа Одағы елдерімен ғы­лыми-техникалық және инно­вациялық ынтымақтастық туралы жан-жақты баяндама жасады.

Одан басқа, сенатор отырыс­та Еуропалық Одақтың Орталық Азиядағы Стратегиясы және ай­­­мақ­тық ынтымақтастығы туралы сөз сөйлеп, Ауғанстаннан НАТО әске­рінің шығарылуына орай тұрақ­тылық пен қауіпсіздіктің, терроризммен, ұйымдасқан қылмыспен, есірткі тасымалымен және адам саудасымен күрестің келешегі жайында әңгіме қозғады.

Шара барысында сенатор Б.Шелпеков Қазақстан мен Еуропа Одағының сауда-экономикалық қатынастары, әлеуметтік-эконо­микалық даму, сондай-ақ, көлік мәселелері туралы сөз қозғады.

Ол сауда-саттық және инвес­тиция салу жөнінен Ресей мен Қытайдан алға шыққан Еуропа Одағы Қазақстанның негізгі әріп­тесі болып табылатынын атап өтті. Республиканың ЕО елдерімен сыртқы сауда айналымы 2012 жы­лы 53 миллиард долларға жуықтаған.

Сонымен қатар, сенатор отырыста қазақстандық әуе ком­па­ния­ларының Еуропа Ода­ғына ұшуына шектеулер мен тыйымды алып тас­тау туралы мәселе көтерді.

СТИПЕНДИАТТАРМЕН ӘҢГІМЕ

Қазақстан Республикасы Парламенті Сенатының депутаты, Әлеуметтік-мәдени даму комитетінің мүшесі Владимир Редкокашин Конрад Аденауэр қорының стипендиаттарымен кездесті, деп хабарлады осы палатаның баспасөз қызметі.

Кездесу барысында сенатор студенттерге Қазақстанның жоғары заң шығару органы және оның жоғарғы палатасы – Сенаттың қызметі туралы әңгімеледі. Депутат Сенат Аппаратының құрылымы мен жұмыс үдерістеріне жан-жақты тоқталды.

В.Редкокашин Әлеуметтік-мәдени даму комитетінің қызметі, комитет аясында өтетін шаралар және палата қабылдаған заңдар туралы түсіндірді.

Конрад Аденауэр атындағы қор Германия Федеративтік Республикасының саяси қоры болып табылады. Қор өз бағ­дар­ламасы және жоба­лары­мен халықаралық ынтымақ­тастыққа үлес қосып келеді.

ЖАСТАРДЫ ЖАТ ПИҒЫЛДАҒЫ АҒЫМДАРДАН САҚТАЙЫҚ

Парламент Сенатының депутаты Жабал Ерғалиев Ақмола облысының Атбасар қаласында жаңа мешіттің ашылу салтанатына қатысты, деп хабарлады осы палатаның баспасөз қызметі.

– Еліміз тәуелсіздігін алған кезеңнен бастап діни сенім бостандығы орнықты. Ол еліміздің Конституциясымен және басқа да қабылданған заңдармен қамтамасыз етілді. Біз ендігі арада жастарымызды имандылыққа тәрбиелеумен бірге, оларды түрлі діндердің жат пиғылдағы ағымдарынан сақтауымыз керек, – деді сенатор.

Ол, сондай-ақ, елдегі ынты­мақ пен бірлікті сақтау біздің ­басты байлығымыз екенін айт­­қан Қазақстан Президенті Нұр­сұл­тан Назарбаевтың сөздерін еске салды.

ӨЗАРА ЫҚПАЛДАСТЫҚТЫҢ КӨКЖИЕГІ КЕҢ

Жақында Хорватияның астанасында «Ақ жол» ҚДП көшбасшысы Азат Перуашев бастаған қазақстандық мәжілісмендердің қатысуымен бірқатар шаралар ұйымдастырылды, деп хабарлады Қазақстанның Хорватиядағы елшілігінің баспасөз қызметі.

Депутаттар хорват Саборына барып, ЕҚЫҰ Парламенттік Ассам­блеясындағы Хорватия делега­циясының басшысы, Ақпарат және бас­пасөз комитетінің төрағасы Бран­ко Вукшичпен, сондай-ақ, Қа­зақстанмен ынты­мақтастық жө­нін­­­дегі парла­мен­т­аралық тобы­ның бас­шысы Иван Рачанмен кездесті.

Кездесу барысында А.Пе­руа­шев мемлекеттік реформалар­ды парламенттік қолдаудың қазақстандық тәжірибесі және Парламент Мәжілісіндегі саяси партиялардың сындарлы өзара әрекеттесуінің маңыздылығы туралы айтып берді. Қазақстанда ауқымды өзгерістердің табысты болуында және заманауи нарықтық экономиканың құрылуында мемлекеттің тұрақты дамуын қамтамасыз еткен 1991 жылғы 1 желтоқсанда президенттік билік институтының енгізілуі басты рөл атқарғаны атап көрсетілді.

Қазақстандағы саяси құры­­лысты жаңғыртуда және қоғамдық келісімді қолдауда парламенттік көппартиялық, саяси партиялар институтының дамуы мен нығаюы белсенді ықпал етіп отырғаны көлденең тартылды. Кездесу нәтижесінде хорват партияларымен достастық байланыстарды кеңейту және Еуропа парламенттік ұйымдарының шеңберіндегі парламентаралық ынтымақтастықты дамыту туралы уағдаластықтарға қол жеткізілді.

Мәжілісмендер хорват депу­тат­тарының, сарапшылары мен профессорлық-оқытушылар құ­рамының қатысуымен, Қазақ­стан­ның Хорватиядағы елшілігі мен Загреб Жоғары экономика мек­тебінің ұйымдастыруымен өт­кен «Қазақстан-Хорватия: эконо­ми­калық ынтымақтастықтың перспективалары мен мүмкін­діктері» атты дөңгелек үстел отырысына қатысты.

Дөңгелек үстелге қатысушылар Хорватияның Еуроодаққа кіруі, оның көліктік-транзиттік инфра­құрылымы және тиімді геогра­фия­лық орналасуы іскерлік ынты­мақ­тастықты дамыту үшін едәуір мүмкіндіктер туғызатынын айтты. Мәжілісмендер Қазақстан Республикасының индустриялық-инновациялық даму бағдарламасы Қазақстан мен Хорватия арасын­дағы сыртқы сауда айналымының өсуі үшін кең мүмкіндіктер ашатынын атап өтті.

БҰЛ – АДАМ ҚАУІПСІЗДІГІНЕ ҚАТЕР

«Нұр Отан» партиясының Саяси доктринасын түсіндіру үшін Атырау облысының Мақат ауданына барған сапарымыздың барысында партия мүшелері мен тұрғындардың қойған өткір сұрақтарының бірі   Мақат – Доссор автожолының жай-күйіне байланысты болды.

Республикалық маңызы бар Ақтөбе – Атырау – Астрахань автожолының Мақат пен Доссор кенттері арасындағы 17 шақырым жері ұзақ жылдардан бері апатты жағдайда қалып отыр. Бұл ретте Мақаттың өнеркәсіп ауданы екендігін атап көрсету қажет. Қазақстанда алғаш өндірілген мұнайдың отаны да осы жер. Соңғы жыл­дары Қарабатанда зауыт құрылысының салынуы экономикаға жаңа серпін берді. Осы мәселені шешудің экономикалық қана емес, әлеуметтік те мәні бар. Бұл – ауданды сыртқы әлеммен байланыстыратын бірден-бір жол. Жолдың осы учаскесін жүріп өту автокөліктің сыну мүмкіндігімен қатар, адамдардың қауіпсіздігіне нақты қатер төндіреді, ал күз-қыс уақытында онымен жүру іс жүзінде мүмкін емес. Осының бәрі Мақат ауданының мемлекеттік бюджетке және еліміздің экономикалық жетістіктеріне қосып отырған үлесін ескергенде, халықтың негізгі түсінбеушілігін туындатады.

Облыс басшылығының, Парламент депутаттарының Үкіметке бірнеше рет жазған өтініштері оң нәтиже берген жоқ. Үкімет 2011 жылдың басында 2010-2014 жылдарға арналған көлік инфрақұрылымын дамыту жөніндегі үйлестірілген салалық бағдарлама Атырау облысында жалпы құны 16,9 млрд. теңгенің бірқатар жобаларын жүзеге асыруды көздейді деп мәлімдеген болатын. Бірінші кезекте, бұл республикалық маңызы бар Атырау –Астрахань автожолын қайта жаңарту және Доссор – Мақат жол учаскесін күрделі жөндеуге қатысты. Алайда, осы уақытқа дейін бұл шешімдер, аудан халқының күнделікті өміріне ешқандай оң өзгерістер әкеле қойған жоқ, ниет туралы мәлімдеулер деңгейінде ғана қалып отыр. Толық күрделі жөндеу үшін 2,020 млрд. теңге қажет. Жобалау-сметалық құжаттамалары дайын. Үкімет рұқсат берсе, облыстың атқарушы органдары онымен Қазақстан, Ресей және Еуропа елдері арасында аса зор көлік ағыны жүретін жолды жөндеуді бастауға дайын.

Жоғарыда айтылғандарға байланысты, Үкімет республикалық маңызы бар Мақат және Доссор кенттері арасындағы жол учаскесін күрделі жөндеу үшін 2,020 млрд. теңге мөлшерінде қаржы қаражатын бөлу туралы мәселені қараса, аталған өңірлер үшін үлкен көмек болар еді.

Еркін ШПАНОВ,

Мәжіліс депутаты.