«Осы жүз жылдықта Жердегі адам өмірінің орта жасы 120-ға жетеді», – деп мәлімдеді антропологияға арналған халықаралық ғылыми-тәжірибелік конференцияда Ресей үкіметі жанындағы сарапшылар кеңесінің мүшесі Сергей Градировский. Бұл туралы ИТАР-ТАСС хабарлады.
«Дамыған елдерде 30 жылдан кейін адам өмірінің орта жасы 120 болмақ. Бұл көрсеткішке Ресей 40-45 жылдан кейін жетеді», – дейді ғалым.
Сергей Градировскийдің айтуы бойынша, адам өмірінің ұзаруы тарихи заңдылық. Мұндай жағдай соңғы бірнеше жүз жылдықтың ішінде екі рет байқалған. «Қазірдің өзінде дамыған елдердегі адамдардың орта жасы 90-ға таяп қалды. 10 мемлекетте әйелдер арасындағы бұл көрсеткіш 85-тен асқан», – деді ол.
Ғалымның пікірінше, адам өмірін ұзартуға жоғары технологиялық медицинаны дамыту мен салауатты өмір салтының ықпалы зор.
Антропологияға арналған халықаралық ғылыми-тәжірибелік конференцияда адамды жан-жақты қалыптастырып, дамытудың түрлі тұжырымдамалық, жобалық, тәжірибелік жолдары қарастырылды. Оған Ресей, Ұлыбритания, Израиль, Ирландия, Мексика, Франция мен Швейцария ғалымдары қатысты.
Айдар Өрісбаев.
Дереккөз: Itar-tass.com