Қазақстанда адам ағзасын алмастыратын күрделі ота жасаудың қас шебері кім дегенде, еске бірден трансплантолог Абылай Донбай түседі. Бүгінде Шымкент қаласындағы №1 қалалық клиникалық ауруханасының бас дәрігері болып қызмет ететін Абылай Донбай бұл салаға саналы ғұмырын арнаған.
Елімізде ғана емес, ТМД елдері ішінде аты жиі айтылатын трансплантолог 11 жылдан бері медицина саласында еңбек етіп келеді. Тіпті Еуропаның үздік медициналық ұйымдарынан ұсыныс түссе де бас тартқан білгір маман туған қаласында еңбек етуді жөн санаған.
Табаны күректей он жылдам астам уақыт аралығында алтын қолды хирург 600-ден аса науқасқа операция жасапты. Хирургия бағытына инновациялық технологияларды енгізіп, трансплантология саласын дамытуға күш салған. Өзі басқарып отырған ауруханадағы білікті мамандармен бірге Абылай Әбдіжаппарұлы 2019 жылы бауыр трансплантациясы отасын 5 сағат 48 минутта жасап, қазақстандық рекордты жаңартқан.
Бүгін өзі жұмыс істейтін №1 қалалық клиникалық ауруханада бүйрек және бауыр трансплантациясы операцияларын сәтті істеуде. Сондай-ақ медициналық туризмді дамыту мақсатында 23 шетел азаматына бүйрек трансплантациясын жасаған. Соңғы рет 166-шы бүйрек трансплантация отасы сәтті аяқталған.
«Бүйрегі немесе бауыры жарамай қалып, шарасыз халге түскен науқастардың көзінен сөнген үмітті байқаймын. Сондықтан мұндай науқастардың өмірін аман алып қалу үшін күрделі ота жасап, үміттерін қайта жалғағым келеді. Науқастардың отадан кейінгі қуанышты жүзін көріп, одан әрі шабыттана түсемін. Өзім басқарып отырған №1 қалалық клиникалық ауруханада жоғары мамандандырылған медициналық қызметтің сапасын арттырсам деймін. Алда жоспарым көп. Ең басты міндетім – сырқаттанған жандарға медициналық көмек көрсету», дейді Абылай Донбай.
ШЫМКЕНТ