Түркиядағы Antalya Cup-2021 халықаралық турниріне қатысып жатқан футболдан Қазақстан жастар құрамасы (U-21) жарысты жеңіспен бастады.
Солтүстік Македониядан келген құрдастарымен жасыл алаңда кездескен Қайрат Нұрдәулетовтің шәкірттері қарсыластарынан 2:1 есебімен басым түсті. Матчтың 54-минутында «Астана» клубының қорғаушысы Сағи Совет есеп ашса, 73-минутта Абылайхан Жұмабек таблодағы көрсеткішті еселей түсті. Айта кетейік, Солтүстік Македония құрамасы былтыр 2021 жылғы Еуропа чемпионатының іріктеу кезеңінде жерлестерімізді өз жерімізде 4:1 есебімен тізе бүктірген еді.
Біздің жігіттер келесі ойынын бүгін Болгария жастар құрамасымен өткізеді. Кездесу елорда уақытымен 20:00-де басталады. Ал 28 наурызда Өзбекстан футболшыларымен кездеседі.