Электрондық цифрлық қолтаңба өз қолымен қойылған қолтаңбаға тең және заңдық салдары да бірдей болады. Бізге жеке және лауазымды тұлғалардың оларға тиесілі ЭЦҚ-ны үшінші тұлғаларға заңсыз беру фактілері бойынша материалдар мен шағымдар көптеп келіп түседі. Едәуір жиі кездесетін жағдайлар – ұйымдардың, оның ішінде мемлекеттік органдардың басшыларының өздерінің ЭЦҚ-сын қараусыз қалдыруы, жұмыстан босатылған қызметкерлердің ЭЦҚ-сын кері қайтармауы, өздерінің ЭЦҚ-сын басқа қызметкерлерге беруі. ОКҚ өткен брифингте ҚР ЦДИАӨМ ақпараттық қауіпсіздік комитетінің төрағасы Руслан Әбдіқалықов «қолтаңбаның» электронды нұсқасының мән-маңызын ескермеудің немесе бағаламаудың салдарынан мысалдар келтіріп өтті.
Заңсыз берілген ЭЦҚ көмегімен сенімхаттар ресімделіп, қаржылық құжаттарға қол қойылған жағдайлар болды.
«ЭЦҚ-ны беру фактілері бойынша біз ҚР ӘҚБтК-нің 640-бабы бойынша әкімшілік істер қозғаймыз және 15-тен 50 АЕК-ке дейінгі мөлшерде қаржы өндіріп алынады. 2020 жылы ЭЦҚ-ны заңсыз берудің және электрондық қолтаңбаны тиісінше қорғаудың 30-дан астам фактісі анықталды, 2021 жылдың басынан бері 6 іс қаралды, өндірісте тағы 3 іс бар», деп атап өтті Әбдіхалықов.
Ол қазақстандықтарды ешбір жағдайда ЭЦҚ-ны басқа тұлғаларға бермеуге, қараусыз қалдырмауға, сондай-ақ кілтті беруді талап етуге ешкімнің құқығы жоқ екенін естен шығармауға шақырды.