Екі «сарының» айқасы

АҚШ-тың Техас штатында орналасқан Арлингтон қа­ласындағы AT&T Stadium ста­дио­нында ұйымдастырылған жек­пе-жек «Канелоның» се­німді жеңісімен аяқталды. 12 раундқа жоспарланған айқастың 8-раундында Сондерстің қа­бағы жарылып, бір раунд бойы бір көзбен жұдырықтасып шық­ты. Раундаралық үзілісте дәрі­герлер британиялық бокс­шыға жекпе-жекті әрі қарай жалғастыруға болмайтынын айтып, бапкерлеріне кездесуді осы жерден тоқтатуға кеңес берді. Сөйтіп мексикалық «сары бала» кезекті қарсыласын мерзімінен бұрын жеңіп, екінші орта сал­мақтағы үш бірдей белбеудің иегері атанды.

Жалпы, «Канело» да, Сон­дерс те қазақстандық бокс жан­­­күйерлеріне өте жақсы таныс. Біріншісі, Отандасымыз Геннадий Головкинмен екі рет шаршы алаңда шеберлік бай­қасып, біреуінде тең түсіп, екіншісінде төрешілердің ше­шімі бойынша жеңіп кеткен.

Ал екіншісі, GGG-мен орта салмақтағы абсолютті әлем чемпионы атағы үшін өтетін жекпе-жекке ұзақ уақыт саудаласып, ақыр соңында жұдырықтасудан бас тартып, Головкиннің төрт алтын белбеудің басын қоса­мын деген арманын жоққа шығарған-ды. Осындай се­беп­термен қазақстандық бокс жан­күйерлерінің ашуын ту­дырған екі бокс­шы­ның арасындағы бұл айқас­ты мексикалық және британиялық жанкүйерлерден кейін қазақстандықтар да та­ғатсыздана күткен еді.Жекпе-жек алдында бокс мамандары да, кәсіпқой бокс­та өнер көрсетіп жүрген кәнігі боксшылар да «Канелоның» жеңісіне сенімді болғанымен, біраз сарапшы Сондерстің бұл жолғы дайындығы мен жеңіске деген ерекше құлшынысын жо­ғары бағалаған-тын. Сон­дай-ақ Сондерс жеңеді дегенге британиялықтың ринг ұзын­дығын 7 метрге жуық болсын деп қиғылық салуы да себеп болса керек. Өйткені Билли кең рингте өзін суда жүзген ба­лықтай еркін сезінетін және көп қарсыласын дәл осындай рингте ойқастап жүріп оп-оңай жеңгеніне жанкүйерлер талай мәрте куә болған еді. Бірақ бұл жолы Сондерске рингтің көлемі де көмектесе алмады. Бри­таниялықтың дегеніне көнген Альварес: «Рингтің көлемін стадионмен бірдей қылса да, шаршы алаңда оны ешкім құт­қара алмайды», деген болатын.

Жекпе-жектің алғашқы раундын барлаумен өткізіп, қар­сыласының әлеуетін байқаған Сауль Альварес әдеттегідей қал­ған бес раундты толық Сон­дерстің еркіне берді. Себебі «Ка­­нелоның» мақсаты – Сон­дерске көп соққы жасауына мүм­кіндік беріп, шабуылдаған қарсыласын шаршатып алу еді. Ал өзі қарымта шабуылға иек артып, тек жекпе-жектің екінші бөлігінде ғана іске кі­рісуді көздеді. Нәтижесінде, 6-раундтан бастап Сауль қар­сыласын соққының астына ала бастады. Дәл осы раундта «Канелоның» апперкоттан, яғни иектің астынан жасаған ауыр соққысы көздеген жеріне дөп тиіп, Сондерсті есеңгіретіп жіберді. Дегенмен соққыға тө­зімді екенін көрсеткен бри­таниялық боксшы жылдам ес жиып үлгерді. Кейінгі екі раундта да Альварес үстемдік танытты. Сөйтіп 8-раундтан кейін Сондерстің бапкерлері төрешіге шәкіртінің жекпе-жекті әрі қарай жалғастыра алмайтынын айтып, «Канелоның» жеңісін мойындады. Осылайша, 30 жекпе-жектің барлығында жеңіске жетіп, оның тең жартысына жуығында қарсыластарын мерзімінен бұрын тізе бүктірген Сондерс карьерасындағы ал­ғашқы жеңілісіне ұшырады. Ал «Канело» болса, кезекті кез­де­суін мерзімінен бұрын аяқ­тады.

Осы жекпе-жек алдында Альварес журналистердің «Го­ловкинмен үшінші рет шаршы алаңда жолығуың мүмкін бе?», деген сауалына: «Әрине, егер Геннадий екінші орта сал­маққа көтерілетін болса, мен три­логияға қарсы емеспін» деген болатын. Бірақ Сондерсті жеңіп, екінші орта салмақтағы үш белдігін иеленгеннен кейін мексикалық боксшыда жа­ңа мақсат пайда болды. Ол енді осы салмақтағы IBF бел­бе­уінің чемпионы амери­ка­лық Калебо Плантомен (21-0, 12 КО) кездесіп, екінші орта сал­мақтағы абсолютті әлем чем­пионы атанбақ ниетте.

Егер ал­дағы қыркүйек айында «Ка­нело» америкалық боксшымен жұдырықтасатын болса, онда Головкин екеуінің арасындағы үшінші жекпе-жек мүлде ұйым­дастырылмауы мүмкін.