Екпе салдыру екпін алмай тұр

19 мамырдағы мәлімет бойынша 36 617 адам коронавирус инфекциясынан емделіп жатыр. Олардың ішінде 13 452 науқас стационарда, 23 165 науқас амбулаториялық деңгейде ем қабылдауда. Індетке шалдық­қан­дардың арасында 761 адам­ның жағ­да­йы ауыр, 185 науқастың жағ­дайы өте ауыр, 110 науқас ӨЖЖ аппаратында жатыр.

Вакцина салдыртқандардың жалпы саны 1 898 604 адам болса, оның ішінде 802 090 адам вакцинаның екінші компонентін алған. Осы ретте Денсаулық сақтау бірінші вице-министрі Марат Шоранов вакциналау қарқыны бәсеңдегенін растады.

– Сәуір айында вакциналау қар­қы­ны тәулігіне 100 мыңнан асты. Бү­гінгі таңда бір күнде вакцина алған адам­дардың саны 30 мың мен 60 мың аралығында болып жатыр. Бірақ бірінші кезектегі міндет – халықты вакциналау мүмкіндігін қамтамасыз ету. Қазір вакциналау кезіндегі халықтың белсен­ділігі төмендеп жатқанын кө­ріп отырмыз. Бұл, ең алдымен, мамыр айындағы мереке күндерінің көп бол­ғанымен байланысты шығар. Біз халықтың күмәні сейіліп, осынау ел үшін аса маңызды шараға белсенді қатысады деп үміттенеміз, – деді М.Шоранов

Сонымен қатар ол вакцина салдыр­ған­дардың ішінде созылмалы ауруы бар нау­қастар мен 65 жастан асқан адам­дардың үлесі қанша екенін атап өтті.

– Қазір диспансерлік науқастар тобына жататын адамдардың ішінде созылмалы ауруы бар науқастардың

4%-ға жуығы вакцина алды. Министр­лік өңірлердегі ахуалды бақылай отырып, алдағы уақытта вакцина алу­ға қарсы медициналық көрсетілім бол­­маған жағдайда созылмалы аур­уы барларды да вакцина салдыруға ша­қы­руды жоспарлауда. Сондай-ақ 250 мың­нан аса жасы 65 жастан асқан адам вакцина салдырды, – деді вице-министр.

Жалпы, ел арасында коронавирусқа байланысты неше түрлі алыпқашпа әңгі­менің тарағаны белгілі. Соның бірін М.Шоранов жоққа шығарып, аме­ри­калық ғалымдардың Қазақстанда ін­деттен 80 мың адам қайтыс болды деген дерегі асыра көрсетілгенін айтты.

– Шынымен де Медициналық көрсетілімдер және бағалау институты (АҚШ) ғалымдарының өлім-жітім туралы хабарламасы болды. Олар коронавирус пандемиясы кезеңінде қосылған өлім-жітімдер бойынша гипотезаға тестілеу жүр­гіз­ген. Ғалымдар өздерінің жұ­мысында мә­ліметтерді өңдеудің түрлі әдістерін қолданатынын, деректер негізінде «тео­риялық гипотеза» түзетінін түсі­неміз. Алайда бүгінде оны тексеру мүм­кін емес. Ең алдымен аталған институттан Қазақстанға да, Денсаулық сақтау министрлігіне де сауал келіп түспегенін атап өткім келеді. Толықтай алғанда, зерттеудің бүкіл әлем осы проблемамен бетпе-бет келгені туралы айтқанымен келісуге болады және қосылған өлім-жітім біздің елге ғана емес, барлық тіпті дамыған мемлекеттерге де тән. Аталған зерттеудегі елімізде бір жылдың ішінде шамамен 80 мың өлім-жітім қосылды делінген дерек тым асыра көрсетілген. Біздің мә­лімет­терге сәйкес, өткен жылы шамамен 28 200 жағдай тіркелді, – деді М.Шоранов.

Бұл ретте Денсаулық сақтау вице-министрі Ажар Ғиният өткен жылы коронавирус инфекциясынан болған өлім-жітімге қатысты нақты деректі атап көрсетті.

– Осы жылдың наурызының соңы­на дейін жыл сайын өңірлерден келіп түсе­тін жылдық есептердің, сонымен қатар Ұлттық статистика бюросының қоры­­тын­дысы бойынша өлім туралы куә­лік­ті азаматтардың хал-акті­ле­ріне кеш тіркеудің барлық жағдайы еске­ріл­ді. Министрлік Ұлттық статис­ти­ка бюро­сымен бірге барлық ста­тистикалық дерек­ті салыстырып тек­серіп шықты. Өткен жылы коро­навирус инфекция­сынан өлім-жітім­ге қатысты нақты дерек 4 729 адам­ды құрайды. Оның ішінде коронавирус инфекциясынан қайтыс болғаны анық, біріздендірілгені – 1 783 адам, ал індеттен көз жұмғаны нақтыланбағаны – 2 946 адам, – деді А.Ғиният.

Вакцинаға деген халықтың күдігін күшейтетін бірден-бір жайт – вакцина алған адамдардың коронавирус­пен ауырып қалуы. Бұған қатысты Ден­сау­лық сақтау министрлігі Сани­тар­­лық-эпидемиологиялық бақы­лау ко­митетінің төрағасы Айжан Есма­ғам­бетова түсініктеме берді.

– Біз вакциналаудың бірінші ком­по­нентінен кейін де, екіншісінен кейін де сырқаттану жағдайларына міндетті түрде мониторинг жүргіземіз. Жалпы, еліміз бойынша бірінші компоненттен кейін аурудың 541 жағдайы тіркелді. Екінші компоненттен кейін 104 жағдай болды. Әдетте, бұл адамдардың бар­лы­ғы инкубация кезеңінде, яғни 14 күннің ішінде ауырған. Бұдан адам­дар­дың вакцина салдырмай тұрып ауру жұқтырғаны көрінеді, – деді А.Есмағамбетова.

Сонымен қатар вакциналаудың аралығы, кейбір вакцина түрінің жетіс­пеушілігі сияқты мәселелер жиі қоз­ғалады. Брифинг барысында Алма­ты­да отандық вакцинаның жетіс­пей жатқаны сөз болды. Бұл сауалға жауап берген А.Есмағамбетова QazVac вакцинасы әлі қолжетімді екенін алға тартты.

Оның айтуынша, отандық QazVac вакцинасының 50 мың дозасы бүкіл ел бойынша үлестірілді. Бұл 25 мың адам­ға есептелген. Алматыға 6 мың доза жеткізілді, яғни 3 мың адамға есеп­телген. Соңғы мәліметтер бойын­ша бүгінгі таңда бұл қалада 2 800 адам вак­циналанған, QazVac-тың әлі 200 дозасы бар.

– Бүгінде кейбір өңірлерде QazVac, ал барлық өңірде Hayat-Vaх және Спутник-V вакциналары қолжетімді. Егер азаматтар QazVac вакцинасын сал­дырғысы келсе, онда, әрине, екінші пар­тияның түсуін күтуге тура келеді. Бірақ Қазақстанда қолданылатын бар­лық үш вакцина да тиімді және қауіп­сіз екенін еске салғым келеді. Қандай да болсын бір вакцинаны күту туралы шешім қабылдағанда, вирус айналымы әлі де тоқтамағанын естен шығармағанымыз жөн. Оны тоқтату үшін тез арада ұжымдық иммунитет қалыптастыруымыз керек, барынша көп азамат екпе салдыруы тиіс. Сон­дық­тан азаматтарды Pfizer немесе QazVac екпелерінің қашан түсетінін күтпей, қолда бар және қолжетімді вак­цинаны салдыруға шақырамын, – деді А.Есмағамбетова.

QazVac – 21 күндік аралықпен салынатын бірдей екі дозалы вакцина. Екпе компонентін алу аралығының өзгеруі тек Спутник-V вакцинасына ғана қатысты. QazVac және Hayat-Vaх бойынша аралықтар өзгерген жоқ.