ЕҰУ-дың үшінші ғылыми журналы – физика-техникалық факультетінде шығарылатын Еуразиялық физика және функционалдық материалдар журналы («Eurasian Journal of Physics and Functional Materials») Scopus ғылымиметрикалық деректер базасына енгізілді.
Айта кету керек, Қазақстанда Scopus базасына кіретін 6 журнал болса, оның 3-ін Еуразия ұлттық университеті басып шығарады. Бұл Математикалық және компьютерлік қосымшалардың Еуразиялық журналы, Еуразиялық математикалық журнал және Еуразиялық физика және функциялық материалдар журналы.
Еуразиялық физика және функциялық материалдар журналы 2017 жылдан бері жарық көріп келеді. Журналдың тең құрылтайшылары – «Біріккен ядролық зерттеулер институты» халықаралық үкіметаралық ұйымы (Дубна қ., Ресей) және «Қазақстанның физика-техникалық қоғамы». Мұнда ядролық физика, жоғары энергия физикасы, баламалы энергетика саласындағы ғылыми теориялық және эксперименттік зерттеулердің нәтижелері, энергетикалық сектордың қоршаған ортаға әсері, функциялық материалдар мен ғылымды қажетсінетін технологиялар туралы ақпарат жарияланады.
Редакциялық алқа құрамы Қазақстан, Ресей, Беларусь, АҚШ, Франция, Жапония, Финляндия, Украина, Швеция, Италия, Өзбекстан және Англияның белгілі ғалымдарынан, сондай-ақ CERN (Ядролық зерттеулер жөніндегі еуропалық ұйым) және БЯЗИ (Біріккен ядролық зерттеулер институты, Дубна қаласы, Ресей) әлемдік деңгейдегі халықаралық ғылыми ұйымдардың өкілдерінен тұрады. Сонымен қатар журналда жарияланатын мақала авторларының 50%-дан астамы – шетелдік ғалымдар.
Ғылыми мақалалар мұқият іріктеліп, тек ағылшын тілінде шығарылады.
Еуразиялық физика және функциялық материалдар журналы Scopus-пен қатар басқа да белгілі халықаралық ғылыми метрикалық дерекқорларда индекстеледі: Index Copernicus International Ltd Poland, Cross Ref (World), Google Scholar, Scilit (Basel, Switzerland), Research Bib (World), Ulrichs web, Cite Factor, DOAJ, РИНЦ (e-library).
Журналда жарияланатын мақалаларды жоғары білікті мамандар іріктейді. Бұл Л.Н. Гумилев атындағы Еуразия ұлттық университетінің Халықаралық ғылыми және баспа беделін көтеруге, әсіресе университеттің 25 жылдық мерейтойына байланысты лайықты үлес қосады. Ғылыми журнал туралы толық ақпаратты басылым сайтынан алуға болады: www.ephys.kz.