Бүгін UEFA Чемпиондар лигасы бірінші іріктеу кезеңінде Алматының «Қайраты» өз алаңында Израильдің «Маккаби» (Хайфа) командасымен қарымта ойын өткізбек, деп хабарлайды Egemen.kz.
Еске сала кетсек, екі команда 7 шілдеде өткен Израильдегі кездесуде 1:1 есебіне қанағат білдірді. Бүгін жеңіске жеткен клуб жарысты жалғастыратын болады.
«Маккаби» (Хайфа) 1913 жылы құрылып, Израильдің 13 дүркін чемпионы атанған. 2020/21 жылғы маусымда жеңімпаз тұғырынан көрінген олар бұл жетістігін тура он жылдан кейін қайталап отыр.
Екі команда былтыр UEFA Еуропа лигасы екінші іріктеу сатысында кездесіп, израильдік клуб 2:1 есебімен жеңіске жеткен болатын.
Бүгінгі «Қайрат» пен «Маккаби» (Хайфа) арасындағы кездесу елорда уақытымен 19.50-де басталады. Жанкүйерлер матчты «Qazsport» телеарнасында өткізілетін тікелей эфирде тамашалай алады.