Биыл Шығыс Қазақстан облысында мыңға жуық өрт шығып, 33 адам көз жұмған. Бұл туралы облыстық төтенше жағдайлар комиссиясының кезекті отырысында белгілі болды, деп жазады Egemen.kz.
Облыс әкімінің орынбасары Ержан Нұрбаевтың төрағалығымен өткен комиссия отырысында бірқатар өзекті мәселе қаралды. Оның бірі – алдағы жылыту маусымында тұрғын үйлердің өрт қауіпсіздігін қамтамасыз ету.
Жыл басынан бері облыста 950 өрт тіркеліп, 582 жер үйді жалын шарпыған. Тілсіз жаудан 33 адам мерт болып, иіс тиген 56 адам ауруханаға жеткізілді.
Көп жағдайда өрттің шығуына – отты абайсыз қолдану (249 оқиға), пеш пайдалану кезінде қауіпсіздік талаптарын сақтамау (160), электр жабдықтарын монтаждау және пайдалану ережелерін бұзу (81) себеп болған.
«Жылыту маусымына дайындық жұмыстары шілде айында басталған. Облыс бойынша барлығы 238 110 жеке тұрғын үй бар. Өрт оқиғаларын болдырмас үшін халық арасында түсіндіру жұмыстары жүріп жатыр. Құтқарушылар, әсіресе әлеуметтік осал топтағы 8172 отбасыға ерекше назар аударған», деп жазады ШҚО Төтенше жағдайлар департаменті баспасөз қызметі.